GALICIA
Cultura celebra o Día da Edición coa difusión do calendario do libro e da lectura 2018
Os 50 anos da publicación d’A galiña azul de Carlos Casares, o 70º aniversario do discurso “Alba de gloria” que Castelao pronunciou en Buenos Aires, o 90º aniversario do poemario De catro a catro, de Manuel Antonio, ou os 130 anos do nacemento de Otero Pedrayo son algunhas das celebracións que promove a Consellería de Cultura e Educación da Xunta de Galicia a través do Calendario do Libro e da Lectura 2018.
Na véspera do Día da Edición, que se celebra o 17 de decembro -coincidindo coa data do nacemento de Ánxel Casal-, a Secretaría Xeral de Cultura difunde en formato electrónico este material, que ten como obxectivo impulsar a realización de actividades arredor das principais datas e efemérides vinculadas co libro e coa lectura no próximo ano. Ademais, nos próximos días o cartel chegará tamén ás librarías galegas e aos centros da Rede de Bibliotecas Públicas de Galicia.
Os usuarios das bibliotecas, protagonistas en xaneiro
Os centros bibliotecarios, que celebran o Día do Usuario/a das Bibliotecas o 11 de xaneiro, comparten protagonismo no primeiro mes do ano coas artes plásticas, coa conmemoración do Día da Ilustración o 30 de xaneiro, data do nacemento de Afonso Daniel Rodríguez Castelao. Co mes de febreiro chegan a celebración do Día da Lingua Materna e do nacemento de Rosalía de Castro, o 21 e o 24 de febreiro, respectivamente.
O mes de marzo comeza coa efeméride do 130º aniversario do nacemento de Ramón Otero Pedrayo o día 5, o mesmo no que se inicia a celebración da Semana da Prensa. No mes de marzal tamén se celebran os días da Narración Oral, o 20; da Poesía, o 21, e do Teatro, o 27. Nesta última data tamén se cumpren os 90 anos da publicación dun dos poemarios máis senlleiros da literatura galega, De catro a catro, de Manuel Antonio. As conmemoracións deste mes complétanse, o día 28, co décimo aniversario da Biblioteca Pública de Santiago Ánxel Casal.
A apertura do mes de abril chega coa celebración do Día das Artes (1), que en 2018 se lle dedica a Alejandro de la Sota, mentres que o 2 e o 23 se conmemoran o Día do Libro Infantil e Xuvenil e o Día do Libro, respectivamente. O mes das Letras homenaxea, nesta ocasión, a María Victoria Moreno, a quen a Real Academia Galega lle dedica o 17 de maio. E o 9 de xuño lémbrase a importancia dos arquivos coa celebración do seu día.
70 anos do discurso “Alba de gloria”
Xa no verán, o 25 de xullo, Día de Galicia, cúmprense 70 anos desde que Castelao pronunciara en Buenos Aires o discurso “Alba de gloria”. Ao día seguinte, o 26, celébrase o Día da Comprensión Lectora. Co Día Europeo das Linguas e co Día da Tradución, o 26 e o 30 de setembro, e co Día das Bibliotecas, o 24 de outubro, chegamos a novembro, o Mes da Ciencia en Galego, cando se celebra tamén o Día das Librarías.
O Calendario do Libro e da Lectura pecha 2018 co Día da Edición, o 17 de decembro, e cunha celebración destacada arredor do autor homenaxeado en 2017 coas Letras Galegas, Carlos Casares: os 50 anos da publicación da súa obra A galiña azul, o día 23 de Nadal.
Con esta iniciativa, a Consellería de Cultura e Educación ten como obxectivo facilitar a planificación anual das actividades culturais e animar o conxunto da cidadanía a participar na celebración das principais efemérides e datas sinaladas arredor do libro e da lectura para a súa difusión e posta en valor.