UNIVERSIDADE
Alumnado da UDC inicia o programa Explorer con 20 proxectos emprendedores
A Coruña.- A Facultade de
Informática acollerá esta tarde, ás 16:00 horas (aula 2.2b) o inicio do
programa Explorer “Jóvenes con ideas”
para que o alumnado da Universidade da Coruña poida desenvolver o seu proxecto
empresarial co asesoramento do programa promovido por Banco Santander a través
de Santander Universidades, coordinado polo CISE e coa colaboración da UDC.
O reitor, Julio
Abalde, a vicerreitora de Estudantes, Participación e Extensión Universitaria,
Margarita Amor, o director de Institucións en Galicia e Asturias de Banco
Santander, Dositeo Terrón, o decano de Informática, Luis Hervella, e un
representante de Secot abrirán esta tarde o programa de formación, apoio e mentoring a 28 estudantes emprendedores
que desenvolverán 20 ideas empresariais, dun total de 40 iniciativas
presentadas, ao longo dos próximos cinco meses. O mellor emprendedor do Explorer Space UDC gañará unha viaxe a
Sillicon Valley e poderá optar a un financiamento de 60.000 euros para poñer en
marcha a súa idea empresarial.
Entre as ideas
máis innovadoras que se desenvolverán hai proxectos relacionados coa realidade
virtual, os videoxogos, a hostalería, o turismo, a moda ou a enxeñaría. O
alumnado seleccionado poderá asistir a sesións prácticas de talleres de design
thinking, creatividade, finanzas, liderado, marketing ou habilidades
comunicativas con 30 horas de formación especializada impartidas polos expertos
que conforman a rede do programa Explorer.
Á súa vez cada proxecto contará co apoio personalizado dun mentor voluntario
que aportará o seu coñecemento e asesoramento. Ao remate dos cinco meses de
formación, o estudante co proxecto mellor valorado do Explorer Space UDC viaxará a Silicon Valley, referente mundial en
innovación, onde recibirá clases maxistrais en empresas tecnolóxicas punteiras,
asesoramento en internacionalización e contacto con investidores. Ademais ao
seu regreso de San Francisco, poderá optar a un dos tres premios nacionais
dotados con 30.000, 20.000 e 10.000 euros para acelerar o desenvolvemento do
seu negocio.
Grazas á
colaboración coa Fundación EY, Explorer
conta tamén co premio Woman Explorer Award que ofrece 20.000 euros para
financiar o mellor proxecto liderado por unha emprendedora e o premio de
innovación Disruptive
Technology Explorer Award, impulsado pola empresa INDRA, con 3.000 euros e
asesoramento por parte de expertos de Indraaventures ao proxecto de negocio
máis innovador.
O
programa Explorer forma parte da
comunidade global Santander X e
representa a evolución do programa Santander Yuzz, unha iniciativa que nas oito
edicións pasadas potenciou as ideas de máis de 4.200 estudantes e xerou centos
de empresas. Departamento de comunicación