Santiago.- O Ateneo de Santiago acolleu a varios representantes dos Ateneos de toda Galicia para levar a cabo a
xuntanza de Ateneos programada nas súas actividades do X Aniversario da
entidade.
Así, á cita acudiron o presidente do Ateneo de Pontevedra Xaime Domínguez Toxo e o Vogal Antón
Sobral, o Presidente do Ateneo Santa Cecilia de Marín Lois González Dopazo e o
Tesoureiro Xulio Xosé Pardellas, o Vicepresidente do Ateneo de Ourense Pablo
González Prieto, o membro da Xunta Xestora do Ateneo Ferrolán Luis Calvo Teijo
e o Presidente do recentemente creado Ateneo de Vigo Anxo Cabada xunto con
outro membro da súa Xunta Directiva.
Por parte do Ateneo
de Santiago asistiron o presidente Salvador García-Bodaño, o Vicepresidente
Manuel López-Rivadulla, o Secretario Francisco Candela e os Vogais Pilar
Sampedro, Xosé Ramón Pousa, MarisaSomoza e José Manuel González Herrán.
A xuntanza comezou, no domicilio social do Ateneo de Santiago, cunha sesión de traballo para
tratar de poñer en común o papel destas entidades de cara ao futuro e os
problemas e retos a superar, centrando o debate no “Pasado, presente e futuro
dos Ateneos”, e, por conseguinte, dar un novo pulo ao seu papel no
desenvolvemento cultural de Galicia, onde a unidade e a solidariedade entre
todos sexa un sino de actuación.
Sinatura dun Convenio de
Colaboración de Ateneos de Galicia
O obxectivo final
desta xornada foi a sinatura dun Convenio de Colaboración de Ateneos de Galicia por parte dos presidentes dos
Ateneos de Santiago, Pontevedra, Vigo e Marín, do Vicepresidente do Ateneo de
Ourense e do membro da Xunta Xestora do Ateneo Ferrolán.
Con este convenio
preténdese impulsar “un achegamento no funcionamento dos distintos Ateneos en
Galicia que posibilite unha continua e estreita colaboración”, concretándose
nos seguintes compromisos:
1. A visualización das
actividades desenvolvidas polos distintos Ateneos.
2. A realización de actividades
conxuntas.
3. Que calquera membro dun
Ateneo poida participar nas actividades dos restantes.
4. A realización dunha xuntanza
anual en cada localidade.
5. A creación dunha
organización a nivel galego.
Este Convenio de
Colaboración entrará en vigor inmediatamente tras a súa sinatura e terá unha
vixencia indefinida.
Programación do X
Aniversario do Ateneo de Santiago
A Xuntanza de Ateneos de Galicia atópase dentro da Programación
do X Aniversario do Ateneo de Santiago, que xa se comezou a desenvolver dende o
mes de xaneiro.
Así,as
actividades iniciáronse o pasado 15 de xaneiro co Ciclo de conferencias “En
clave de futuro-10 anos do Ateneo de Santiago”, as cales teñen lugar unha vez
ao mes no Auditorio Abanca do Preguntoiro. Desta maneira, por esta tribuna xa
pasaron o experto en ciberseguridade Ramsés Gallego, o paleontólogo Juan Luis
Arsuaga e o historiador José Álvarez Junco, todos eles con moi boa acollida, e,
proximamente, o 16 de abril poderemos desfrutar da viúva de Saramago Pilar del
Río falando sobre o “Iberismo en Saramago”.
Dentro
desta Programación especial tamén se atopa convocado o Premio Alfredo Vicenti
de xornalismo cívico, que pretende “promover un debate cívico sobre asuntos de
interese social, favorecendo o espazo público para mellorar a calidade de vida
dos cidadáns”. A este premio poden presentarse traballos publicados entre o 1
de novembro de 2017 e o 30 de outubro de 2018, data límite para o acceso,
dándose a coñecer o gañador o vindeiro 20 de novembro. Departamento de comunicación