Santiago.- O presidente da
Xunta, Núñez Feijóo, afirmou hoxe que coa estación intermodal de
Santiago comeza a materializarse o novo modelo de transporte público en Galicia,
que está a vivir a maior renovación dos últimos 40 anos. Coa futura “estación
total”, a capital galega terá unha única terminal onde conflúan os servizos de
autobús, ferrocarril e taxi, ademais da lanzadeira cara ao aeroporto de
Lavacolla.
“Non é un día calquera para Galicia, porque esta é a primeira estación
intermodal que estamos a iniciar na Comunidade autónoma”, recordou. O
presidente repasou tamén o traballo feito ata o momento. O primeiro paso foi
conseguir fondos suficientes “para que no ano 2018 ou 2019 poidamos estar
executando catro ou cinco estacións intermodais de forma conxunta”. O segundo
foi a lograr a vontade do Ministerio de Fomento e do Concello de Santiago,
encargado de deseñar e adecuar os accesos ao recinto.
En terceiro lugar, Feijóo salientou a firme determinación da Xunta por
poñer en marcha esta infraestrutura nos prazos previstos, que se reflicte non
só na construción da terminal de autobuses —presupostada en 10,4 millóns— senón
tamén no cofinanciamento da pasarela que unirá este edificio coa estación de
ferrocarril e coa rúa do Hórreo, que eleva a achega total do Executivo
autonómico ata os 12 millóns de euros. Así mesmo, recordou que grazas á Lei
autonómica que facilita a tramitación urbanística dos proxectos de interese
público, o planeamento puido axustarse á obra que tecnicamente se requiría en
tan só sete meses.
“Estamos nun momento importantísimo para o transporte”, valorou o
presidente, que subliñou a necesidade de facilitar a vida dos cidadáns e de
mellorar a competitividade de Santiago de Compostela como destino turístico.
Isto faise, ademais, “cun proxecto esteticamente atractivo, respectuoso en
volumes e no deseño arquitectónico e que vai ter máis dársenas das que hai en
San Caetano e un aparcadoiro de vehículos en función das necesidades futuras”.
Respecto á pasarela que unirá os barrios do Ensanche e Pontepedriña,
Feijóo recalcou o compromiso da Xunta de licitala e facer o seguimento das
obras para que a pasarela estea rematada ao mesmo tempo que a estación no seu
conxunto, sempre e cando Fomento cumpra cos prazos. O presidente enmarcou a
nova intermodal dentro dos preparativos para que o Xacobeo 2021 sexa o mellor
da historia.
Aposta por
Santiago
Feijóo fixo tamén referencia aos demais proxectos que están en marcha na
capital galega, comezando polo proxecto da Cidade de San Caetano, que ampliará
as dependencias da Xunta ocupando o espazo da actual estación de autobuses,
mellorará a atención aos cidadáns e suprimirá a necesidade de alugueiros. Citou
tamén os traballos de integración
paisaxística dos treitos urbanos da ruta xacobea, a adxudicación xa de máis da
metade do solo industrial do Polígono da Sionlla, a Variante de Aradas e o edificio
Fontán, que pon o punto e final á Cidade da Cultura.
“Evidentemente, se o AVE non chegase a Santiago, a utilidade desta
estación sería ben distinta”, advertiu o presidente, antes de indicar que a chegada
da alta velocidade será un antes e un despois para Galicia e de recordar que o
inicio da súa circulación en probas está previsto para finais do 2019. “Nós
imos manter a esixencia leal con este Goberno, do mesmo xeito que a mantivemos
co anterior”, engadiu. O presidente tamén afirmou que Galicia se está
preparando para recibir o AVE coas estacións intermodais executadas: coa de
Santiago; coa de Ourense, que xa está adxudicada e na que as obras comezarán
nas vindeiras semanas; coa de Pontevedra, na que a unión entre estacións xa
está deseñada; coa de Vigo, na que se está esperando o desbloqueo definitivo; e
tamén coas de Lugo e Ferrol.
Por último, lembrou as actuacións que aínda están pendentes na capital
galega: a depuradora que Santiago necesita, o enlace orbital que cuxo impulso
lle pedirá Feijóo ao ministro de Fomento e a finalización da autovía entre Lugo
e Santiago, da que algúns tramos están en execución e outros xa finalizados.