POLÍTICA | BNG
O BNG pregunta á Comisión Europea pola venda de armas a Arabia Saudita
A eurodeputada do BNG, Ana Miranda,pregunta á
Comisión Europea pola venda de armas a Arabia Saudita nunha pregunta escrita
dirixida á Alta Representante da UE para Asuntos
Exteriores e Política de Seguridadee vicepresidenta da Comisión,
FedericaMogherini,en relación a exportación de armas por parte de Estado
español de 400 bombas de precisión láser. Miranda reclama ademais que se
garanta que as exportacións non poidan ser empregadas para cometer violacións
dos dereitos humanos.
A eurodeputada nacionalista lembra que o Estado
español asinou o “Tratado sobre o Comercio de Armas” que esixe unha exportación
responsable de armamento e que as armas exportadas non se usen para cometer
violacións ao dereito internacional. Ao respecto a coordinadora de Internacional
da Executiva do Bloque sinala que un dos supostos baixo o que a exportación de
armas estaría prohibida é se existe información de que as armas poderían
empregarse para cometer ataques dirixidos contra civís ou bens de carácter
civil.
Ao respecto, Ana Miranda recorda asemade que o
atentado perpetrado en Iemen no pasado mes de agosto, no que faleceron ducias
de nenos e nenas, foi reivindicado por Arabia Saudita, polo que reclama que o
Estado español “non sexa cómplice desas terribles matanzas”.
Segundo os datos manexados polas organizacións
de defensa dos dereitos humanos, a utilización de bombas occidentais en Iemen
ten provocado máis de 10.000 civís mortos, e case 9 millóns de persoas en
situación de miseria. Neste sentido a eurodeputada do Bloque critica as
palabras ministro de Asuntos Exteriores español, JosepBorrell, segundo as que "as
armas de precisión non crean efectos colaterais", polo que non atopa razóns
para paralizar a venda.
Complicidade
dos Estados
“É inxustificable e rexeitable a complicidade de
moitos Estados europeos que seguen exportando armas aos saudís”, polo que
defende que a Unión Europea investigue e aclare se as exportacións de armas a
Arabia Saudita foron empregadas contra a poboación en Iemen e reclama garantías
de que isto non aconteza e demanda coñecer cantos Estados europeos venden armas
a este país.
“Desde o BNG defendemos unha política e unhas
relacións internacionais baseadas na paz e na solidariedade cos pobos e as
xentes que se atopan en situación de pobreza”, subliña Ana Miranda, quen
considera preciso que a Unión Europea defina e poña en práctica unha política
internacional propia, orientada ao fortalecemento da ONU, para que desempeñe o
papel para o que foi creada de mediadora nos conflitos e que free a política
militarista. Departamento de comunicación