Santiago. Dende 1989 lévase
falando en Santiago de Compostela da creación dun xardín botánico para a cidade,
un espazo verde á beira do río Sarela para o cal o Consorcio, no seu momento,cedera
á Universidade catro hectáreas de terreo. O proxecto inicial, que nunca se
chegou a materializar, consistía nunha infraestrutura de investigación concibida
polo Catedrático da USC Jesús Izco, quen estará hoxe (20:00 horas) nas
conferencias dos Luns do Ateneo para poñer de novo sobre a palestra esta
iniciativa baixo o título “Os xardíns botánicos ao servizo da sociedade”.
E é
que na actualidade os xardíns botánicos non só cumpren as súas funcións tradicionais
de investigación, conservación e educación, se nón que pasaron a ter un valor
engadido cara á sociedade, desempeñando cometidos didácticos, científicos e
divulgativos, así como de reforzo da cultura popular, motor do turismo e fonte
de recursos e coñecemento de cara ao urbanismo e paisaxismo. De todo isto
falará hoxe o experto en xardinería, rematando coa tradicional quenda de preguntas
por parte do público asistente, quen poderá acceder libre e gratuitamente ata
completar o aforo dispoñible.
Licenciado e Doutor
en Farmacia pola Universidade Complutense de Madrid, Jesús Izco foio primeiro
profesor numerario da Facultade de Ciencias Biolóxicas e Ambientais do campus
de León da Universidade de Oviedo. Posteriormente exerceu como docente na
Complutense de Madrid e como Catedrático de Botánica na Universidade de Santiago
de Compostela, onde chegou a ser Vicedecano da Facultade de Farmacia, impulsando o
Herbario e o Banco de Germoplasma. Durante 10 anos traballou como asesor
científico do Secretario Xeral de I+D da Xunta de Galicia e participou da
Comisión de Árbores Singulares. É membro de diferentes sociedades científicas
de España, Portugal, Suíza, Alemaña, Italia e Francia, cofundador da Academia
de Farmacia de Galicia, da que foi o primeiro presidente, e foi membro da
comisión de redacción da Estratexia Nacional para a conservación da
biodiversidade e uso sostible do Ministerio de Medio Ambiente. Entre moitos
recoñecementos destacan o Premio de Publicacións da Real Academia Galega de
Ciencias así como o Investigador adhonorem e a Insignia de Ouro “Alonso de
Fonseca” da Universidad de Santiago de Compostela. Departamento de comunicación