Santiago. Hoxe, o Ateneo de Santiago nos seus actos dos Luns do Ateneo acollerá unha conferencia sobre Camilo e Isaac Díaz. Baixo o mesmo título que a exposición inaugurada o pasado 9 de outubro, “Con Galiza sempre no horizonte. Camilo Díaz Baliño e Isaac Díaz Pardo en Compostela”, o seu Comisario Xosé Ramón Fandiño repasará a actividade vital e artística dos 16 anos que pai e fillo viviron en Santiago (1920-1936) así como a actividade artística, industrial e cultural de Isaac Díaz Pardo dende que se viu obrigado a abandonar a súa cidade natal e o seu posterior regreso en 1978. O acto, que se desenvolverá como sempre ás 20.00 horas na Rúa do Vilar, 19, de Santiago de Compostela, é de acceso libre e gratuíto ata completar o aforo dispoñible e rematará cunha quenda de preguntas por parte do público asistente.
Este relatorio ven a complementar a mostra gráfica e documental exposta no Colexio de Fonseca e que se pode visitar ata o 30 de novembro en horario de luns a sábado de 11.00h a 14.00h e de 17.00h a 20.30h, así como o catálogo editado para a ocasión, con textos de Xosé Ramón Pousa, Manuel Rivas, Xosé Ramón Fandiño e Gloria López ademais dunha lección maxistral de Díaz Pardo e entrevistas e artigos de Díaz Baliño. Os actos de homenaxe completaranse cunha serie de visitas guiadas á exposición realizadas polo propio Xosé Ramón Fandiño que comezarán o sábado día 17, tendo que anotarse previamente en ateneo@ateneodesantiago.com antes do xoves 15.
Xosé Ramón Fandiño Veiga é Licenciado en Filoloxía Hispánica pola Universidade de Santiago de Compostela. Foi redactor e director da Gran Enciclopedia Gallega, así como dos primeiros tomos de Xeografía de Galicia. Colaborou con Isaac Díaz Pardo no deseño da política cultural do grupo Sargadelos e foi colaborador, tradutor e asesor científico de importantes eventos culturais. Tamén foi guionista de varias series para TVE e TVG e como ensaísta destacan os seus estudos sobre literatura galega do século XIX, a visión de Santiago dos grandes escritores universais ou sobre Castelao e a súa obra. Posúe unha ampla traxectoria como tradutor ao galego e colaborou en diversos medios de comunicación. Desta etapa é de subliñar o “Premio de Xornalismo V Centenario” co que a Universidade de Santiago distinguiu ao programa “Galicia Universitaria”, que dirixiu e presentou. É membro do Padroado do Museo do Pobo Galego, do Pedrón de Ouro e da Asociación de Tradutores en Lingua Galega e colaborador do Instituto de Estudos Galegos “Padre Sarmiento”, englobado no Centro Superior de Investigacións Científicas (CSIC). Departamento de comunicación