OURENSE
A Xunta promociona os produtos agroalimentarios galegos no salón gastronómico Xantar
Ourense | A Consellería do Medio Rural participa un ano máis na Feira
Internacional de Turismo Gastronómico Xantar, que se celebra ata o
vindeiro domingo en Expourense, para promocionar os produtos
agroalimentarios galegos de calidade. Precisamente hoxe o director da
Axencia Galega da Calidade Alimentaria (Agacal), Manuel Rodríguez,
participou na actividade “Experiencias de calidade dos queixos de
Galicia con denominación de orixe”, onde se fixo unha maridaxe dos
produtos das catro denominación protexidas dos queixos de Galicia con
viños das denominacións de orixe Rías Baixas e Ribeiro.
A través
desta axencia vaise desenvolver un amplo programa de actividades con ata
15 eventos nos que se poderán coñecer e degustar produtos galegos como o
mel, carnes, augardentes, produtos ecolóxicos, pan, patacas, grelos,
queixos e castañas. Os viños, augardentes e licores tradicionais de
Galicia tamén teñen unha presencia destacada cun túnel de degustación,
onde poderán coñecerse as marcas gañadoras das catas oficiais de Galicia
e outras propostas enolóxicas galegas.