Logo dun encontro con empresarios, o
presidente da Xunta, Alberto Núñez Feijóo continuou a súa axenda coa
sinatura dun convenio de colaboración co Institute of Fine Arts (IFA)
para a organización, en 2020, dun simposio internacional sobre o Camiño
de Santiago que terá lugar na cidade de Nova York.
No acto de
sinatura, Feijóo quixo trasladar ao IFA o agradecemento polo seu
compromiso coa ruta xacobea e coa súa proxección internacional, a través
da organización conxunta deste encontro único entre os académicos
europeos e americanos sobre as rutas xacobeas e baixo a proposta de
elaborar unha publicación actualizada en inglés sobre este tema.
Máis
polo miúdo, o responsable do Goberno galego precisou que o simposio,
que estará coordinado por dous estudosos da talla de Robert A. Maxwell e
Manuel Castiñeira, abordará as diferentes maneiras nas que o Camiño foi
permeable á creación de pensamentos e ideas, soños e historias,
romances e cantares épicos. “Estamos a falar dun encontro ao que se
invitará a especialistas en todos os campos –en historia da arte,
literatura, folclore e historia-, co obxecto de dar unha ampla visión
sobre a construción da imaxe e a imaxinación destas rutas”, explicou,
subliñando que as conclusións que se extraerán serán de grande
utilidade, non só no plano máis académico senón tamén no máis humanista.
“O
Camiño de Santiago é a representación dunha capacidade humana a miúdo
esquecida. Esa capacidade consistente en que cada individuo, cada
rexión, cada pobo pode deixar o seu selo na ruta común que todos
transitamos”, abundou, incidindo en que o encontro irá moito más alá da
recompilación de análises especializados. Non en van, este fenómeno
antigo, que frutificou nunha infinidade de pensamentos e ideas, de soños
e de historias, de romances e de cantares épicos, segue marcando a
miles de mulleres e homes cada ano, e ademais cada vez con maior
intensidade.
Feijóo concluíu animando ademais a avaliar como
podería trasladarse o espírito do Camiño á humanidade dos nosos días,
“porque se fomos os primeiros en derribar os muros que illaban aos
europeos do pasado, agora queremos estar cos que cren que a defensa do
propio non se fai separando, senón unindo”.
O presidente da Xunta
rematará o día visitando o Instituto Cervantes, onde terá lugar a
presentación da programación académica vinculada á exposición Os
Adeuses, organizada polo Consello da Cultura Galega.