O secretario xeral para o Deporte, José
Ramón Lete Lasa, presentou esta mañá o Campionato Galego de campo a
través do programa XOGADE que se disputará o vindeiro sábado 16 no
Complexo Deportivo de Monterrei e reunirá a preto de 400 nenos e nenas
das catro provincias -103 da provincia de Pontevedra, 99 da provincia da
Coruña, 90 da provincia de Lugo e outros 90 da provincia de Ourense-. O
máximo responsable do deporte galego volveu a vista atrás para lembrar
os inicios do programa XOGADE en 2009 cando unha “renovada” Xunta de
Galicia deseñou esta ferramenta “para xuntar toda a oferta deportiva e
competitiva, escolar e federada, nun programa lúdico e participativo
para os escolares dos centros de toda Galicia”. Naquel momento, dixo o
secretario xeral, a Xunta contaba con 57.009 nenos e nenas mutualizados
ao abeiro do programa, “hoxe conta con 126.350, un 120% máis que naquel
primeiro ano”, informou.
Neste sentido, o titular da carteira de
Deporte da Xunta incidiu no incremento do investimento destinado ao
seguro deportivo que dá cobertura aos galegos e galegas entre idades de 6
a 16 e do que se fai cargo a Secretaría Xeral para o Deporte. Neste
2019, apuntou, “a prima do seguro alcanza un investimento de 1.750.000
segundo a licitación coa empresa adxudicataria na que se acadaron máis e
mellores coberturas”. Do mesmo xeito lembrou que en 2009 destinábanse a
este respecto 190.000 euros polo que a partida que se ocupa do seguro
medrou un 821%.
José Ramón Lete Lasa tamén incidiu na importancia
do programa XOGADE como actividade paralela ao Plan Galego para o
Fomento da Actividade Física Galicia Saudable, xa que acadar que o
deporte se converta en hábito dos máis cativos garante a mellora “das
nosas estatísticas contra a obesidade e as enfermidades provocadas polo
sedentarismo”.
Os 400 nenos e nenas que competirán o sábado no
Campionato Galego de campo a través , tanto nas modalidades individual e
por equipos nas categorías alevín, infantil e cadete, chegan a esta
cita tras clasificarse nos sesenta eventos de cross previos do XOGADE
entre fases previas, comarcais e provinciais. Nesta tempada, o cross
conta con máis de 32.000 nenos e nenas inscritos.
Ao fío desta
idea, Lete Lasa valorou a “amplísima oferta” que se fai desde o programa
XOGADE e manifestou que “aínda pode ser maior”, atendendo ás “demandas
dalgunhas federacións que solicitan maior presenza dos seus deportes no
ámbito escolar”. “Por iso estudamos a posibilidade de ampliar a oferta
do XOGADE coa incorporación de novas modalidades deportivas como o remo
indoor que está a ter unha gran acollida”, anunciou.