MOSTRA VALOR E MESTRÍA
Feijóo: "Revisar a historia do fútbol en Galicia supón transitar pola biografía do país"
O presidente do Goberno galego, Núñez Feijóo, enxalzou hoxe a
mostra Valor e mestría. Galicia como fútbol como unha oportunidade
única para coñecer o rostro máis nobre do deporte e entender a
importancia das metas colectivas e das visións compartidas. “Estamos a
falar dunha oportunidade para coñecer de primeira man a historia e aos
protagonistas dun deporte que é algo máis, pola súa innegable incidencia
social, económica e mesmo ideolóxica”, aseverou.
Durante a
inauguración, Feijóo subliñou, deste xeito, que a exposición logra,
explorar a influencia do fútbol na construción das identidades
colectivas; “porque revisar a historia do fútbol en Galicia supón
transitar pola biografía do país, recuperar imaxes icónicas fixadas na
retina coa potencia da emoción e, en definitiva, explorar rituais,
tradicións e símbolos que forman parte de nós e nos definen como país”.
Ao
longo da súa intervención, o responsable do Executivo autonómico
avanzou que, a través de máis de 300 pezas -trofeos, medallas,
fotografías, vídeos, audios de radio, carteis, bandeirolas, camisetas,
botas, bufandas e outro tipo de obxectos-, achegadas por diferentes
institucións, clubs e coleccionistas privados, a mostra dirixe a mirada
do visitante cara a historias que cómpre coñecer e vindicar como
exemplares, como a da propia Verónica Boquete; a da porteira Irene,
pioneira do fútbol feminino en Galicia, capitá dun equipo de homes a
principios do século XX; ou a historia do Karbo, da Coruña, primeiro
equipo campión de España de fútbol feminino, nos anos oitenta.
“Son
historias que nos falan, tamén aquí, no fútbol, da necesidade da
igualdade de xénero e de apoio ao fútbol feminino”, sentenciou,
resaltando que todas as pezas acreditan, ademais, o carácter cultural da
mostra. Un carácter que se reforza coa presenza dos medios de
comunicación: xornais e revistas, cortes de radio e imaxes televisivas
enriquecen a exposición.
Nesta mesma liña, referiuse ao papel que
no fútbol xogan os árbitros e, tamén, os adestradores, destacando, en
relación a estes últimos, aos dous que máis partidos dirixiron en
Primeira División: Carriega e Arsenio Iglesias.
Logo de precisar
que de aquí ao peche, previsto para o 1 de setembro, levaranse a cabo
numerosas actividades paralelas no Gaiás, Feijóo concluíu con palabras
de agradecemento para o presidente da Federación Galega de Fútbol; para a
Liga de Fútbol Profesional, colaborada da exposición; para os clubs,
“pola súa gran xenerosidade nos préstamos”; para os xogadores e ex
xogadores que cederon pezas; para os comisarios da exposición, Antón
Castro e Rubén Ventureira, e para David Carballal, deseñador do
catálogo.
Así mesmo, referiuse ao fútbol afeccionado, ao que se
lle rende tributo ao final da mostra, cun pase de fotografías e
destacando que en Galicia hai máis de 78.800 licenzas e 4.039 equipos de
fútbol-11. Uns números que converten a Comunidade na primeira autonomía
en número de licencias por poboación e cuarta con máis licencias.