PAZO DE MEIRÁS
Goretti Sanmartín mostra o seu apoio a Carlos Babío tras a denuncia da familia Franco
A Coruña | A vicepresidenta da Deputación da Coruña, Goretti
Sanmartín Rei, mostrou o seu apoio ao investigador Carlos Babío tras a denuncia
por inxurias e calumnias presentada contra el pola familia de Francisco Franco.
Goretti Sanmartín destacou que "herdeiros e herdeiras do ditador síntense
acurralada e, por iso, actúa da mesma forma que faría o seu avó, tratando de
impedir a liberdade de expresión".
Goretti Sanmartín Rei quixo facer tamén un
recoñecemento ao papel desenvolvido polo investigador Carlos Babío, coautor do libro Meirás, un pazo, un caudillo, un espolio, á hora de desvelar as
trampas do ditador para que o Pazo de Meirás pasase por propiedade privada de
Francisco Franco cando, en todo caso, tería que ser un ben público pertencente
a Patrimonio Nacional.
"Os estudos de Carlos Babío e a súa
investigación de tantos anos está a ser peza fundamental para a elaboración dos
informes xurídico e histórico que nos permiten ter base documental para
reclamar o Pazo de Meirás para patrimonio público e iso é o que realmente molesta
á familia Franco, que se desvele o procedemento empregado polo ditador para
engrosar o seu patrimonio", explica Goretti Sanmartín Rei.
Engade tamén que Carlos Babío participou e o seu
traballo foi de especial relevancia para a Xunta pro Devolución do Pazo de
Meirás, promovida desde a Deputación da Coruña, que sumou forzas de
institucións e entidades implicadas na historia do Pazo de Meirás e que
coincidían no interese de poñer fin ao espolio perpetrado na ditadura.
"Desde a creación da Xunta pro Devolución do
Pazo de Meirás fixéronse públicos dous informes moi claros que demostran,
amparadas nas investigacións de Babío, que hai razóns abondosas para reclamar
con éxito o inmóbel e iso é o que alporiza aos Franco que saben que pode chegar
o momento de que poñamos fin aos seus privilexios", sinala Goretti
Sanmartín.
A vicepresidenta da Deputación da Coruña lembrou
que os informes xurídico e histórico foron remitidos no pasado mes de agosto ao
Director General da Memoria Histórica, e que a pasada semana volveu a dirixirse
a Fernando Martínez para reclamarlle "celeridade e decisión" para
botar a andar un proceso para o que, segundo apuntou, "existen argumentos
reais e probas contundentes". Departamento de comunicación