O director xeral de Mobilidade, Ignacio
Maestro, xunto co delegado territorial da Xunta, Ignacio López-Chaves,
participou hoxe na Comisión de seguimento do Plan de Transporte
Metropolitano da área de Vigo, que acordou a renovación do Plan para o
ano 2020, cun orzamento de preto de 1,4 millóns de euros
Segundo
este acordo, a Consellería de Infraestruturas e Mobilidade achegará 1,1
millóns de euros, correspondéndolles ao conxunto dos 12 concellos
integrantes da área de transporte preto de 266.000 euros.
Este
plan permite viaxar nesta área a través dun sistema de billete único e
da coordinación entre o transporte interurbano e o bus urbano. Os
usuarios que aboan as viaxes coa tarxeta de Transporte Metropolitano de
Galicia acceden a descontos nas viaxes interurbanas.
O convenio
prorrogado hoxe supón tamén descontos adicionais do 15% para os usuarios
recorrentes (aqueles que realizan máis de 40 viaxes ao mes) e
bonificacións tamén para membros de familias numerosas, neste caso de
entre o 20% e o 50% en función da categoría.
Ademais, os menores de 19 anos poden viaxar de balde empregando a tarxeta Xente Nova.A
Área de Transporte Metropolitano de Vigo está integrada por un total de
12 concellos: Baiona, Cangas, Fornelos de Montes, Moaña, Mos, Nigrán, O
Porriño, Pazos de Borbén, Redondela, Salceda de Caselas, Salvaterra de
Miño e Soutomaior.
O Plan de Transporte Metropolitano de Galicia
está a funcionar actualmente en cinco áreas de Galicia (A Coruña,
Ferrol, Santiago, Lugo e Vigo) con 65 concellos incorporados.