GALICIA
A Xunta establecerá o cumprimento do calendario de vacinación para a matriculación nunha escola infantil pública ou concertada
O titular do Goberno galego, Núñez Feijóo, informou hoxe, na
rolda de prensa do Consello, tras a valoración favorable por parte da
Asesoría Xurídica da Xunta, de que a partir do curso 2019/20 se incluirá
como requisito para a matriculación nunha escola infantil pública o
axeitado cumprimento do calendario de vacinación. Para acto seguido
puntualizar que tamén será de aplicación nas prazas públicas en escolas
infantís privadas que se rexan polos prezos establecidos pola Xunta.
De
xeito que, sinalou, esta determinación será incluída na resolución de
matrícula que se publicará mañá mesmo no DOG. Ao que engadiu que os pais
contarán con 8 días a partir da publicación da adxudicación da praza
pública no Diario Oficial de Galicia para presentar un impreso de
matrícula e unha copia da cartilla de vacinación da nena ou neno.
Durante
a súa intervención, Feijóo precisou que para a Administración
autonómica é prioritaria a protección da saúde dos menores e que esta
decisión é perfectamente compatible cos dereitos e obrigas das familias,
coa súa liberdade ideolóxica, relixiosa ou de culto. “O feito de que un
cativo cumpra co calendario de vacinación non só protexe a súa saúde
senón que tamén protexe a das nenas e nenos que o rodean no seu día a
día” abundou.
A este respecto, o presidente da Xunta aseverou que
se trata dunha decisión que ademais de contar co amparo da lexislación
vixente está baseada en criterios médicos, conta co consenso da
totalidade da profesión médica, e coa concienciación dunha elevadísima
porcentaxe da sociedade galega.
En definitiva, concluíu, a partir
do próximo curso comezarase a aplicar unha medida que conta cun amplo
consenso social, que terá un importante potencial de concienciación e
axudará a blindar a protección da saúde pública nun dos espazos máis
delicados que existen, as escolas infantís.