A Xunta vén de trasladarlles aos concellos galegos que o Plan de
transporte público está aberto á participación municipal a través de
bonos para colectivos específicos ou liñas de autobús locais.O
director xeral de Mobilidade da Xunta, Ignacio Maestro, dirixiuse por
escrito aos municipios galegos para convidalos a colaborar coa Xunta
para proporcionarlles aos cidadáns os mellores servizos de autobús
posible.
No seu escrito, sinala que todas as iniciativas locais
destinadas a reforzar a utilidade e o atractivo do transporte público,
tales como os servizos de interese municipal ou os bonos activados polos
concellos para colectivos cidadáns específicos, terán perfecto encaixe
no Plan de transporte público que está a desenvolver a Xunta de Galicia.
A
Dirección Xeral de Mobilidade ofrece o seu asesoramento aos concellos
que estean interesados en manter as actuais iniciativas municipais de
fomento do transporte público, así como dos que desexen explorar novas
vías de colaboración que xa están previstas nos contratos que se
licitarán proximamente.
Ignacio Maestro lembra que o proceso en
marcha para renovar todas as concesións de servizos regulares de autobús
interurbano de Galicia constitúe unha oportunidade inédita para
mellorar o transporte público que todas as administracións deben
aproveitar, coa maior implicación posible, para acadar o maior beneficio
para a cidadanía.
As concesións de servizos de autobús
interurbano de Galicia perderán a súa caducidade neste ano 2019, motivo
polo que a Xunta está inmersa nunha reordenación integral do mapa de
liñas a través da elaboración do Plan de transporte público de Galicia.
Segundo
explica o director xeral de Mobilidade, o obxectivo deste proceso é
cumprir coa regulación que emana da Unión Europea e, sobre todo, acadar
un sistema de transporte público capaz de responder de xeito máis eficaz
e eficiente ás necesidades de mobilidade dos galegos ao longo da
vindeira década.
No seu escrito, Maestro expón que “contar cun transporte público de
calidade é un dereito básico dos cidadáns e un obxectivo estratéxico
para as administracións públicas que debemos contribuír a un
desenvolvemento máis limpo e sostible desde o punto de vista ambiental”.
Por
ese motivo, detalla que a Xunta de Galicia fixo da modernización do
transporte público “unha liña prioritaria de traballo” a cuxo mantemento
destinaremos, ademais, unha importante cantidade de recursos públicos
que estimamos que se achegará aos 70 millóns de euros anuais.
Así
mesmo, salienta que o éxito do proxecto dependerá do diálogo e a
colaboración entre todas as administracións que comparten a visión do
transporte como unha peza esencial da sociedade. E, desde ese punto de
vista, lembra que no proceso de redacción do Plan de transporte e dos
proxectos de explotación que o concretan, a Xunta considerou
imprescindible contar coa participación das entidades locais, por seren
estas as administracións máis próximas aos cidadáns e, polo tanto, as
mellores coñecedoras das súas necesidades concretas de mobilidade.
Esa
foi, incide, a finalidade dos encontros, tanto provinciais como
individuais, que se celebraron desde o pasado verán con todos os
concellos galegos tiveron, precisamente, por finalidade coñecer esas
necesidades coa fin de atendelas coa maior fidelidade posible nos novos
proxectos de contratos de transporte.
Ademais, e co mesmo ánimo de
acadar o maior grao de acerto posible, unha vez elaborados os primeiros
anteproxectos de explotación, o pasado mes de febreiro se celebrou un
proceso de información pública sobre os mesmos nos que todas os axentes
interesados, entre eles por suposto, as administracións locais, tiveron
ocasión de presentar as oportunas suxestións que están a ser analizadas.