A conselleira de Medio Ambiente, Territorio e Vivenda, Ángeles
Vázquez, emprazou hoxe ás entidades locais e á sociedade galega en xeral
a camiñar da man da Xunta para cumprir cos principais retos fixados por
Europa e a normativa estatal co fin de optimizar o tratamento dos
residuos sólidos urbanos. Durante a inauguración da xornada Pensa en
circular. Xestión de biorresiduos, dirixida a persoal de entidades
locais, técnicos e xestores de lixo, Vázquez Mejuto referiuse á
necesidade de seguir dando pasos para achegarse ao obxectivo fixado pola
Comisión Europea para que o próximo ano se reciclen o 50% dos residuos
domésticos.
Para aproximarse a esa meta e pese a que a competencia
sobre a xestión das distintas fraccións de lixo de orixe doméstica e
comercial recae sobre as entidades municipais, a conselleira explicou
que o seu departamento ten en marcha un paquete de actuacións e medidas
para apoiar aos concellos nesta materia. Así, para 2019 a Xunta ten
reservado un orzamento de case seis millóns (5,65 millóns) para
actuacións destinadas a mellorar a xestión dos residuos sólidos urbanos.
Deles,
unha partida de 1,29 millóns de euros dedicarase a financiar a orde de
axudas para a instalación de puntos limpos móbiles e novos proxectos de
recollida selectiva da fracción orgánica. Estímase que un total de 154
concellos, segundo os datos que facilitou a conselleira, poderán
beneficiarse destas subvencións, tendo en conta as solicitudes recibidas
e que actualmente están en fase de valoración.
Por outra banda,
Vázquez Mejuto tamén se referiu á convocatoria aberta este ano para que
as entidades locais interesadas puidesen solicitar contedores
específicos para a recollida de biorresiduos. Concretamente e unha vez
pechado o prazo para pedilos, a previsión é que un total de 45 entidades
municipais se beneficien do reparto dos 4.670 contedores incluídos na
convocatoria deste ano, cun orzamento de 0,56 millóns de euros.
Así
mesmo, no marco do desenvolvemento do Plan de Xestión de Residuos
Urbanos (PXRUG) 2010-2022 tamén se prevén para este ano outras medidas
de diagnose, prevención e actuación para apoiar aos concellos en
relación cos biorresiduos municipais e a loita contra o desperdicio
alimentario.
Precisamente, en relación aos residuos de alimentos
que se xeran fundamentalmente nos fogares –arredor do 42% do total- a
conselleira incidiu en que a Xunta quere poñer enriba da mesa
experiencias con éxito sobre separación, tratamento e prevención deste
tipo de desperdicios. Neste sentido, insistiu na importancia da
concienciación cidadá, tanto para inculcar hábitos de compra e de
consumo máis responsables, como á hora de prestar máis atención antes de
desbotar alimentos.
Así, lembrou que un terzo dos alimentos que se producen no mundo se
perden ou desperdician, é dicir, unhas 1.300 millóns de toneladas
anuais. Unhas cifras que animou a reducir pola vía da concienciación da
poboación a través de campañas e actuacións de educación ambiental sobre
xestión de residuos impulsadas pola Xunta en colaboración con outras
entidades como Ecoembes ou Ecovidrio e ás que este ano se destinarán un
total de 2,66 millóns de euros.
Novidades normativas
Máis
aló dos investimentos e campañas impulsados pola Xunta para alcanzar as
metas fixadas en materia de xestión de residuos domésticos, a
conselleira de Medio Ambiente tamén se referiu ao traballo que está a
desenvolver o seu departamento para dotar a Galicia, a medio prazo, dun
novo e moderno marco normativo na materia.
Así, referiuse en
concreto á tramitación da futura Lei de Residuos e Solos Contaminados de
Galicia, no marco da cal pechouse hoxe mesmo o prazo para o envío de
suxestións ao anteproxecto e que previsiblemente será aprobada o próximo
ano, co obxectivo de fomentar a prevención e a reutilización de
residuos ata acadar en 2025 unha redución do 15% dos residuos que se
producen na actualidade.
A nova normativa virá precedida pola
aprobación, este mesmo ano, de dúas ferramentas clave desde o punto de
vista medioambiental, tanto para a mellora da eficiencia enerxética como
para a optimización e aproveitamento dos recursos: a Estratexia Galega
de Cambio Climático e Enerxía 2050 e a Estratexia de Economía Circular.
Así mesmo, tamén avanzou que o vindeiro ano a comunidade terá implantada
a chamada Axenda 2030 para o desenvolvemento sostible, unha folla de
ruta aprobada polas Nacións Unidas no ano 2015 co obxectivo de dar os
pasos necesarios para acadar un mundo máis xusto e sostible a través do
impulso das iniciativas e políticas axeitadas.
A xornada, organizada no marco do programa de accións formativas
previsto no Plan de Xestión de Residuos Urbanos de Galicia (PXRUG),
estivo estruturada en tres bloques, nos que participaron representantes
de institucións nacionais e locais, membros da administración pública e
especialistas de consultoras e empresas con experiencia nesta materia
que afondaron nas súas intervencións nas diferentes vías desde as que se
pode analizar o tratamento de residuos orgánicos, para ofrecer
solucións adaptadas a cada caso.