A Coruña | O xurado dos premios PEL que convoca a
Deputación da Coruña reuniuse hoxe, na sede da institución provincial, para
avaliar as candidaturas presentadas ao III Premio Premio Provincial á Mellor
Iniciativa Empresarial.
Os gañadores
do certame daranse a coñecer nos próximos meses, nun acto que contará coa
presenza do presidente da Deputación, Valentín González Formoso, o deputado de
Promoción Económica, José Luis García, e representantes do tecido empresarial
da provincia. Así mesmo, o evento promoverá a creación de
redes de traballo entre todas as empresas candidatas.
A Deputación convocou este premio por terceiro ano
consecutivo dentro das accións do Plan de Emprego Local (PEL), co obxectivo de
recoñecer o traballo realizado polas pequenas e medianas empresas, autónomos e
autónomas, concellos de menos de 20.000 habitantes e asociacións empresariais
comprometidos co desenvolvemento económico da provincia.
57 empresas, 14 concellos e 13 asociacións da provincia
optan aos galardóns
Un total de 84
candidaturas presentáronse ás cinco categorías coas que conta o galardón,
dotadas con 15.000 euros cada unha:
Mellor Iniciativa Empresarial Nova, dirixida a proxectos emprendedores con
menos de 12 meses de antigüidade; Mellor Iniciativa Empresarial Consolidada,
destinada a aquelas empresas que conten con máis de cinco anos de
actividade, Mellor Iniciativa Xeradora
de Emprego, que premiará ás empresas que contribúan ao crecemento do emprego
sostible e de calidade na provincia, Concello Promotor do Emprego de Calidade,
dirixada aos concellos coruñeses que promoven e favorecen o emprego e o
emprendemento e Mellor Asociación Empresarial, cuxa finalidade é valorizar a
labor das asociacións de empresarios/as á hora de fortalecer o tecido
empresarial.
O xurado estivo presidido polo presidente da
Confederación de Empresarios da Coruña (CEC), Antonio Fontenla Ramil, mentres
que o secretario foi Rafael Díaz-Aguado, Xefe do Servizo de Promoción
Económica, Turismo e Emprego. Así mesmo, participaron especialistas de
diferentes ámbitos relacionados co mundo da empresa e representantes de
asociacións e outras organizacións de empresarios con presenza nos concellos
coruñeses, como José Manuel Cotos Yáñez, profesor titular da Universidade de
Santiago de Compostela (USC); José Andrés Faíña Medín, presidente do grupo de
investigación de competencia e desenvolvemento rexional da unión europea da
Universidade da Coruña (UDC); Rosa Mary Cardeso Trillo, secretaria da Cámara de
Comercio de Santiago de Compostela; Carlos Fernández Bermúdez, xefe dos
servizos técnicos da Cámara de Comercio da Coruña e Isabel Ferro Giménez,
xerente de proxectos de I+D do Grupo Calvo.
Os membros do xurado avaliaron as candidaturas
presentadas, seguindo criterios coma a orixinalidade da idea de negocio, a
xeración de emprego, a capacidade de expansión, as inicitiavas de fomento do
emrpendemento postas en marcha polos concellos, os servizos prestados polas asociacións
empresariais, entre outros.
A Coruña, Santiago e
Bergondo presentan o maior número de candidaturas
A meirande parte das empresas que concorren aos premios
teñen o seu domicilio nos concellos de A Coruña (15), Santiago de Compostela
(9) e Bergondo (4). En canto aos concellos, concorren os de Ares, Brión,
Cerceda, Coirós, Curtis, A Laracha, Mazaricos, Ortigueira, Porto do Son, Santa
Comba, Sobrado, Valdoviño, Vedra e Vimianzo. No referente á quinta categoría,
de mellor asociación empresarial, o concello de Ferrol é a que presenta unha
maior representación (3), seguido dos concellos de Santa Comba (2) e Santiago
de Compostela (2).
En canto aos ámbitos de actividade das empresas, destacan as dedicadas aos
servizos técnicos ou tecnolóxicos, así como as empresas de servizos de
educación e formación, do sector audiovisual e musical, dos sectores agrícola e
gandeiro, téxtil, comercio electrónico, consultaría etc. Departamento de comunicación / Deputación da Coruña