PONTEDEUME
Pontedeume acollerá en xuño a feira "Primavera no Camiño Inglés"
Pontedeume acollerá o sábado 22 de
xuño a terceira edición da feira “Primavera no Camiño Inglés”, que volverá a
reunir aos dezaoito concellos polos que discorre este itinerario xacobeo nun
gran evento organizado pola Deputación co obxectivo de promocionar os múltiples
atractivos etnográficos, culturais, naturais e gastronómicos desta ruta, que
conecta Ferrol e A Coruña con Santiago de Compostela.
A feira e o circuíto de actividades
culturais que se organizan arredor dela durante os meses de abril, maio e xuño
foron presentados hoxe na sede da institución provincial polo alcalde de
Pontedeume e deputado provincial, Bernardo Fernández, os deputados responsables
das áreas de Turismo, Xosé Regueira, e Economía, Antonio Leira, e a
coordinadora do calendario cultural, Paula Cabaleiro, que coincidiron en
destacar o éxito das dúas edicións anteriores do evento, celebrado en 2017 e
2018 en Betanzos, onde reuniu a miles de visitantes.
Unha gran carpa acollerá os dezaoito
postos nos que os concellos polos que pasa o Camiño Inglés (Ferrol, Narón,
Neda, Fene, Cabanas, Pontedeume, Miño, Paderne, Betanzos, Abegondo, A Coruña,
Culleredo, Cambre, Carral, Mesía, Ordes, Oroso e Santiago) darán a coñecer a
súa variada oferta turística con diferentes actividades que incluirán
actuacións musicais, showcooking en vivo e degustación de distintos produtos
típicos coma a tortilla de Betanzos, o pan de Carral, as troitas de Oroso, a
proia de Pontedeume, a empanada de Neda ou o queique de Ordes, ofrecendo aos
visitantes un completo percorrido gastronómico polos sabores máis
característicos do Camiño.
“É unha honra para Pontedeume tomar
o relevo deste evento, despois do éxito acadado nos dous últimos anos en
Betanzos”; afirmou Bernardo Fernández, que apuntou que “unha zona cargada de
historia”, a Alameda de Raxoi, acollerá a feira este ano.
Fernández apuntou que “o Camiño
funde a súa pegada en Pontedeume dende o século XVI” e destacou “o importante
impacto socioeconómico” que supón para o municipio, cun incremento progresivo
do 30% anual de peregrinos nos últimos anos que fixeron que os rexistros
oficiais pasaran de 2.600 camiñantes rexistrados en 2016 a máis de 5.000 o
pasado ano.
No mesmo sentido incidiu o deputado
de Economía, Antonio Leira, que subliñou que o Camiño Inglés é o itinerario
xacobeo que máis medra. Citando datos dun estudo da Universidade da Coruña
afirmou que cada peregrino gasta arredor de 50 euros diarios, o que para un
concello como Oroso supón un impacto anual de máis de 600.000 euros.
“O Camiño e patrimonio, cultura,
paisaxe…pero tamén economía para os concellos da provincia”, apuntou o
deputado, recén chegado de Durham (Reino Unido), “a orixe deste itinerario,
onde vimos de instalar as primeiras sinais que indican o Camiño Inglés en
territorio británico.
Pola súa banda, o deputado de
Turismo, Xosé Regueira, destacou a condición da provincia coruñesa como
“epicentro do Xacobeo” e subliñou o importante esforzo de promoción que a
Deputación levou a cabo estes catro anos nos dous itinerarios que discorren
integramente por territorio coruñés: O Camiño Inglés e a prolongación da fin do
Camiño Fisterra-Muxía.
Regueira subliñou que o seu
departamento vén de completar unha auditoría do Camiño que permitirá ao goberno
provincial levar a cabo unha planificación
de cales son as accións a levar a cabo.
“Os camiños teñen que servir para
unir, ser un punto de encontro para achegar cultura e experiencias”, afirmou
Regeueira, que destacou a calidade da programación cultural que nos vindeiros
meses percorrerá distintos municipios da provincia e que permitirá ao peregrino
“atopar cultura viva, contemporánea, ao longo do Camiño”.
Un proxecto de creación artística arredor do Camiño
Paula Cabaleiro explicou a programación
incluida no circuíto cultural “Do Camiño Vivido´19”, que se desenvolverá en cinco municipios da
provincia: Oroso, Narón, Culleredo, Betanzos e Ordes e que ten como obxectivo
que o Camiño sexa un alicerce visible do noso patrimonio material e inmaterial.
“Despois do éxito da pasada edición,
a Deputación en colaboración cos cinco concellos implicados, usando como
vehículo de expresión a cultura contemporánea, pretende difundir e dar a
coñecer os atractivos patrimoniais do Camiño Inglés”, explicou.
Este proxecto de creación artística
arredor do Camiño utilizará o espazo público
para levar a cabo as súas representacións artísticas, nas que ademais o
público terá un papel activo dentro do marco destas actividades. Nesta edición, que comeza xa
esta fin de semana, contarase con artistas de diferentes disciplinas
artísticas.
O concello de Ordes será o encargado de abrir estas xornadas participativas os días 12 e 13 de abril da man de
María Marticorena coa súa intervención artística e perfomance colaborativa
“Heiche de tocar as cunchas” e a compañía de danza contemporánea Pisando Ovos,
composta por Ruth Baldís e o DJ Jas Processor, propón a peza “Give it a spin”
onde se mestura a música co baile.
Continúa a programación o concello de Culleredo, onde os días 27 e 28 de abril a artista Nastasia Zurcher
acompañada polo produtor e arreglista Adrián Saavedra presentarán o seu
espectáculo “Un camiño de fusión e liberdade” seguido do espectáculo de danza e
circo “Analepsis” de Paula Quintas CIA. Traspediante.
No mes de maio os concellos de Narón (venres, 3 de maio) e Betanzos
(sábado, 4 de maio) tomarán o relevo coa obra “Velliñas” correspondente a
compañía Inherente Teatro e a obra de danza contemporánea de Serdanza “Camiño
a_” como a demostración de cociña en directo e degustación “Saboreando o Camiño
Vivido” de Kike Piñeiro.
O concello de Oroso cerrará estas xornadas o
1 de xuño coa actuación musical por parte de Blues do país e a demostración
de cociña e degustación de Guillermo Pérez. Departamento de comunicación / Deputación de A Coruña