DEPUTACIÓN DA CORUÑA
A Deputación financia con 900.000 euros os servizos de limpeza de praias de 41 concellos da provincia
A Coruña | O Boletín Oficial da Provincia publica
hoxe a adxudicación definitiva do programa de limpeza de praias 2019, a través
do cal a Deputación da Coruña repartirá 900.000 euros entre 41 municipios
costeiros coruñeses.
A finalidade do programa é apoiar
aos concellos coruñeses no sostemento dos gastos de contratación do persoal das
brigadas que se encargarán da limpeza dos areais da provincia, así como da
adquisición do material necesario, vestiario ou combustible.
Segundo explicou o presidente da
Deputación da Coruña, Valentín González Formoso, “o programa contribuirá, un
ano máis, á mellora da imaxe de máis de 360 praias coruñesas de cara á tempada
estival, e axudará tamén á creación de emprego durante os meses de verán, xa
que a cargo deste programa e do de contratación de socorristas en piscinas
municipais contratáronse o pasado ano preto de 300 persoas, unha cifra que
espera que sexa similar este ano”.
González Formoso destacou que A
Coruña é a provincia española con máis quilómetros de costa e que as praias dos
concellos costeiros son un dos principais atractivos turísticos. “A Deputación
apoia un ano máis aos concellos da provincia para que os nosos areais estean en
condicións óptimas para este verán”, apuntou o presidente.
A subvención para a creación destas
brigadas de limpeza ten unha duración máxima de tres meses, que deberán estar
comprendidos na época estival. Departamento de comunicación / Deputación da Couña