Baiona | A Consellería de Cultura e Turismo acaba de habilitar ao Concello de
Baiona para autorizar as intervencións patrimoniais en todo o seu ámbito
municipal, tal como queda establecido no convenio asinado hoxe entre o
conselleiro Román Rodríguez, e o alcalde Ángel M. Rodal Almuíña; ao que
tamén asistiu o delegado territorial da Xunta en Vigo, Ignacio
López-Chaves.
Deste xeito, Baiona convértese no segundo
concello de Galicia que acada esta habilitación patrimonial dun xeito
completo, para todo o seu territorio, logo de que a nova lei do
Patrimonio Cultural (lei 5/2016) incorporase esta técnica
descentralizadora. Desde o pasado ano 2018 tamén os concellos de
Mondoñedo e Ourense teñen esta habilitación, aínda que no caso da Cidade
das Burgas é tan só de carácter parcial, porque atinxe unicamente ao
núcleo de Seixalbo.
O conselleiro de Cultura e Turismo explicou
que, máis aló da tramitación puramente administrativa, esta
habilitación ten unha destacable repercusión práctica na medida en que
permite ao Concello axilizar os trámites administrativos e acurtar os
prazos das intervencións no citado núcleo, pero garantindo totalmente a
seguridade xurídica nos procesos.
Beneficioso para os veciños
Román
Rodríguez subliñou tamén a importancia de avanzar na colaboración cos
concellos, facéndoo a través dunha xestión máis fácil e eficiente que
repercuta de xeito positivo no día a día das persoas. En palabras do
conselleiro, o acordo de hoxe beneficia aos veciños de Baiona porque
lles será máis doado levar a cabo melloras como “arranxar unha vivenda,
cambiar unha cuberta ou arranxar un cuarto de baño, por exemplo”.
Ao
abeiro de dito convenio, o Concello de Baiona estará habilitado para as
intervencións que se refiran a bens catalogados integrantes do
patrimonio arquitectónico ou etnolóxico e as súas contornas de
protección e zonas de amortecemento. Non obstante, quedan fóra destas
habilitacións os bens declarados de interese cultural, os bens
catalogados do patrimonio artístico ou arqueolóxico, ou calquera ben
incluído no ámbito territorial delimitado como Camiño de Santiago, así
como os que sexan titularidade da Igrexa católica e as actuacións de
salvagarda que promova a Consellería competente en materia de patrimonio
cultural.
Planeamento e medios técnicos
Isto é
posible porque, tal como establece a lei, o Concello de Baiona cumpre
cos requisitos esixidos como é contar cun planeamento urbanístico
adaptado á Lei 2/2106, do Solo de Galicia, así como cun equipo de
persoal técnico competente en materia de arquitectura, a arqueoloxía e a
historia da arte.
Este acordo enmárcase dentro da Lei 5/2016 do
Patrimonio Cultural de Galicia e dos acordos coa FEGAMP relativos aos
trámites de autorizacións nos bens inmobles catalogados e declarados de
interese cultural, os seus contornos de protección e as zonas de
amortecemento de aplicación para a totalidade dos concellos de Galicia. O
obxectivo é simplificar trámites e facilitar aos cidadáns os permisos
de intervención nesta área. Cómpre lembrar que a Consellería de
Cultura e Turismo está a desenvolver a mencionada Lei do Patrimonio co
obxectivo de combinar a máxima protección do patrimonio sobranceiro de
Galicia coa axilidade e a simplificación dos trámites
interadministrativos.