O
Día das Letras Galegas adiántase ao próximo luns 13 nunha nova sesión dos
Luns do Ateneo. Nesta ocasión, será momento de lembrar ao homenaxeado nesta
celebración, Antón Fraguas, coa conferencia do Antropólogo Manuel Vilar
Álvarez, autor da exposición sobre a súa figura realizada no Museo do Pobo
Galego en 2006. A cita, que recibe o nome de “Fraguas, o traballo calado”, será
a partir das 20.00 horas na Rúa do Vilar, 19 de Santiago de Compostela, e tamén
se poderá seguir en directo a través da páxina de facebook da entidade.
Así,
o Ateneo homenaxeará ao historiador, etnógrafo, antropólogo e xeógrafo
galeguista, cun gran coñecedor da súa persoa como é Vilar Álvarez. Licenciado
en Xeografía e Historia, doutorando en Antropoloxía e Máster en Xestión de Bens
Culturais e Patrimonio, o seu labor profesional desenvólvese no campo da
antropoloxía e patrimonio, comisariando exposicións, como a que realizou en
2006 no Museo do Pobo Galego sobre a figura de Antón Fraguas. Ten presentado
comunicacións en diferentes congresos e publicado distintos artigos sobre os
seus traballos de campo relacionados co Patrimonio Etnográfico e Museos e é autor
de varios libros entre os que destacan Teóricos
da Arte, Dicionario Xaquín Lorenzo
“Xocas” ou Camiño de Santiago a Muxía
por Brandomil, entre outros. En 2009 recibiu o Premio de Investigación
Rutas Xacobeas da Asociación de Cámaras de Comercio dos Camiños Xacobeos por un
traballo sobre o camiño de Fisterra e Muxía. Máis información