Santiago de Compostela | O martes, o Ateneo de Santiago -coa colaboración de Afundación- clausurará o II
Ciclo Cinema e Educación cun grande éxito de participación da cidadanía
compostelá.
Para
este acto de peche a película elixida foi unha recente estrea do cinema francófono
como é Les héritiers (A profesora de
historia), que analiza o sistema educativo do país francés no presente século
XXI. Dirixida por Marie-Castille Mention-Schaar e non recomendada para menores
de 7 anos, relata como Anne Gueguen, unha profesora de Historia de instituto
preocupada polos problemas dos seus difíciles alumnos e frustrada polo seu
materialismo e falta de ambición, cambia as súas vidas a través da realización
dun proxecto para participar nun concurso nacional sobre o significado de ser
adolescente nun campo de concentración nazi.
A
sesión, de entrada libre e gratuíta ata completar a capacidade da sala,
comezará ás 19.00 horas na Rúa do Vilar, 19, de Santiago de Compostela, coa
presentación do filme por parte do Profesor de Ciencias da Educación da USC
José Armas e a Profesora de Lingua francesa no IES Xulián Magariños de Negreira
Isabel Martínez Rodríguez. A continuación, como colofón a todo o ciclo, terá
lugar un Faladoiro, dirixido por estes dous profesores, onde se analizará con detalle
a película en relación con todas as anteriores.
Así,
este II Ciclo Cinema e Educación veu mostrando, ao longo de mes e medio, como o
cine se ten enfrontado a diferentes aspectos da realidade educativa en Europa,
dende os anos trinta do século pasado ata os primeiros deste século XXI, a
través de cinco películas moi representativas, catro clásicos e esta última estrea
recente. Máis información