GALICIA | DÍA DOS MUSEOS
A Xunta organiza unha programación especial para celebrar o Día Internacional dos Museos
Os museos xestionados pola Consellería de
Cultura e Turismo ofrecen durante toda esta semana un amplo programa de
actividades para todos os públicos para celebrar, o 18 de maio, o Día
Internacional dos Museos baixo o lema Os museos como eixes culturais: o
futuro da tradicións. O obxectivo marcado nesta edición polo Consello
Internacional de Museos é subliñar os novos papeis que desempeñan os
museos como axentes activos nas súas comunidades. Con este fin, os
museos de xestión autonómica teñen programadas actividades como xornadas
de portas abertas, visitas guiadas, concertos, obradoiros, espectáculos
de monicreques ou romarías.
Moitos dos museos empezan xa a
celebración da efeméride nas xornadas previas ao 18 de maio. É o caso do
Museo das Peregrinacións e de Santiago, que hoxe ofrece unha visita
guiada á antiga sede do museo. Será as 21,00 horas e poderase participar
nesta actividade tamén os días 14, 15 e 16 de maio. Hoxe tamén arranca a
programación no Museo Arqueolóxico Provincial de Ourense cun obradoiro
didáctico dirixido ao alumnado da ESO e Primaria que leva por título
Reinterpretando o pasado e que se celebrará todos os días lectivos desta
semana entre as 11,00 e as 12,30 horas. Ademais, o mércores o museo
ourensán tamén acollerá a presentación do libro Álvaro de Cadaval
Valladares y Sotomayor. Para completar a axenda dos días previos, o
Museo Arqueolóxico Provincial de Ourense ten programadas visitas guiadas
ao edificio do museo (mércores e xoves ás 20,15 horas).
O Museo
Etnolóxico de Ribadavia decidiu adiantar, así mesmo, a celebración do
Día Internacional dos Museos. Hoxe e mañá terá lugar, entre as 10,00 e
as 14,00 horas, unha visita teatralizada ao museo, así como obradoiros
para escolares. Ademais, o xoves a Escola Municipal de Música de
Ribadavia ofrecerá un concerto nas instalacións do museo. O 17 de maio,
coincidindo co Día das Letras, o museo participará na romaría
Etnográfica Raigame. O Museo Etnolóxico de Ribadavia alongará as
actividades ata finais do mes de maio con unha visita ao Museo Comarcal
de Fonsagrada (sábado 25 de maio) e unha charla sobre astronomía e unha
actividade de observación do ceo, na noite do venres 31 de maio.
Na
Fundación Camilo José Cela os actos para o Día dos Museos enmárcanse na
celebración do Letreseo, xa que nunha mesma semana se conmemora o
nacemento de Camilo José Cela (11 de maio) o Día das Letras (17 de maio)
e o Día dos Museos (18 de maio). Con este motivo, o acceso a Fundación
Camilo José Cela é gratuíto durante toda a semana. Ademais, o sábado 18,
haberá unha visita teatral a partir das 17,00 horas.
Actividades para todos os públicos
O
18 de maio, todos os museos teñen xornada de portas abertas, con
entrada de balde. Ademais, no Museo Arqueolóxico Provincial de Ourense
está prevista unha sesión vermú amenizada polo grupo Blues do País.
Pola
súa banda, no Museo do Castro de Viladonga, en Castro de Rei, o Día
Internacional dos Museos contará cunha ampla axenda que empezará ás
17,30 horas con xogos tradicionais e a actuación do grupo Festicultores
Toupe. A xornada continuará cun concerto de swing protagonizado polo
grupo Por mi swing, que se celebrará ás 19,30 horas. Para terminar
ofreceranse petiscos e queimada a partir das nove da noite.
A
música tamén está presente na programación do Museo das Peregrinacións e
de Santiago, que rematará a súa programación co concerto de jazz a
cargo de A viaxe de Yoyo. Antes diso haberá un obradoiro de elaboración
de monicreques para o público infantil, que se celebrará en sesións de
30 minutos entre as 11,30 e as 13,30 horas, e un espectáculo de
monicreques a cargo de Títeres Cachirulo, ás 19,00 horas.
No caso
do Museo de Belas Artes da Coruña a actividade iniciarase ás 11,00 horas
co obradoiro Museocine, que se repetirá ás 12,30, 17,30 e 19,00 horas.
Xa pola tarde, a partir das 18,30, haberá unha visita guiada. A
programación rematará as 21,30 horas co concerto Rock no museo. Por
outra parte, o Museo Massó de Bueu ten previsto un obradoiro práctico
de aprendizaxe de nós mariñeiros básicos e elaboración dun chaveiro co
nó puño de mono. Será a partir das 11,30 horas e está dirixido a nenos
maiores de 7 anos.
Centro Galego de Arte Contemporánea
O
CGAC ten programadas diferentes sesións arredor do Día dos Museos. A
primeira delas terá lugar o día 14 de maio cun programa de cinema
fantástico de principios do século XX con banda sonora orixinal en
directo que se repetirá na xornada do mércores 15 de maio. Ademais,
tamén o martes o Centro Galego de Arte Contemporánea desprazarase á sede
da Fundación Eduardo Pondal coa vontade de abrir o museo á sociedade.
Nesta xornada, traballarase coa mocidade nun taller no que se
reflexionará sobre a arte e arquitectura partindo da súa propia
realidade urbanística.
Outras das actividades que acollerá o CGAC
son o Programa de Educación Artística para a Integración de Persoas con
Diversidade Funcional –mércores entre as 17,00 e as 19,30 horas– ou o
Programa de Visitas guiadas á arquitectura e á historia do CGAC –venres,
sábado e domingo a partir das 12,00 horas–. Coincidindo co Día
Internacional dos Museos, o público poderá achegarse ao CGAC para gozar
das mostras de Loreto Martínez Troncoso, Ángela de la Cruz e René
Heyvaert acompañado por mediadoras especializadas en arte. A visita
partirá da recepción do museo ás 12,00 horas e ten como finalidade
estimular o interese pola creación artística contemporánea e facilitar a
comunicación entre o espectador e as obras de arte.
Cidade da Cultura
A
Cidade da Cultura propón un amplo programa, enteiramente de balde, que
inclúe edicións especiais das visitas comentadas ás exposicións,
obradoiros de artesanía nos que se conxuga tradición e creación
contemporánea e un vermú musical con piano-bar ambientado nos anos 30 e
40 no Hall de Tirantes do Museo. Así, a actividade central será o
obradoiro colectivo de cestería Enleadas. Estará impartido por dúas das
nosas creadoras artesás máis vangardistas e internacionais: as cesteiras
Julia de la Cal e Idoia Cuesta –Premio Nacional de Artesanía 2014 e
creadora de pezas que teñen chegado á Pasarela Mercedes Benz Fashion
Week de Madrid xunto á deseñadora Sara Coleman ou á firma LOEWE–.
Pola
súa banda, os artesáns Susana González, Antón Román e Roberto Piñeiro
impartirán un segundo obradoiro-demostración, neste caso de torneado
cerámico. Será unha excelente oportunidade para coñecer de primeira man
esta disciplina artesá, gozar da experiencia de ver como se traballa nun
oficio con tanto peso e arraigamento no noso patrimonio, e incluso
sentar ao torno para modelar o barro coas propias mans e levar para a
casa unha pequena peza de recordo.
A programación complétase con
edicións especiais das visitas comentadas ás dúas exposicións que
actualmente acolle o Museo Centro Gaiás, Pensar coas Mans. Cestería,
cerámica e xoiería de Galicia e Valor e mestría. Galicia como fútbol,
guiadas polos comisarios das mostras, Verónica Santos e Rubén
Ventureira. Tamén o Gaiás Secreto programa unha edición especial con
motivo dos festexos do Día dos Museos.
Para pór o toque lúdico a
esta xornada festiva nos museos de todo o mundo, todas as persoas
participantes están convidadas tamén a unha sesión vermú musical
ambientada nos anos 30 e 40. Para esta actividade, que conta coa
colaboración de Petroni, o grupo Le BarLuthier traerá a música do seu
piano-bar ao Hall de Tirantes do Museo entre as 13,00 e as 14,00 horas.