GALICIA
Os gandeiros de leite galegos levan facturado 368 millóns de euros no que vai de ano
Os ingresos dos gandeiros de leite
galegos seguen medrando. En concreto, nos primeiros cinco meses do ano
(maio é o último mes do que se teñen datos oficiais) os titulares de
explotacións lácteas facturaron 368 millóns de euros, o que supón un
2,3% máis que no mesmo período de 2018.
Así o avanzou hoxe o
conselleiro do Medio Rural, José González, durante a inauguración das
novas instalacións da Sociedade Agraria de Transformación (SAT) A Campa,
situada no concello coruñés de Curtis. Alí, José González sinalou tamén
que Galicia segue a ser líder en España no sector lácteo español con
preto do 40% da produción.Neste senso, o titular de Medio Rural
resaltou que a facturación dos gandeiros galegos tamén representa o 37%
da mesma a nivel nacional, unha boa cifra que amosa estabilidade no
sector neste momento.
Deste xeito, o conselleiro sinalou como
“incuestionable” que o sector lácteo é un dos principais motores do
rural galego e, polo tanto, da economía da nosa autonomía. Neste
sentido, o titular de Medio Rural ofreceu o apoio da Xunta para que siga
sendo así. De feito, José González mostrouse convencido de que “no
rural se pode vivir e se pode vivir ben”. Ao tempo, trasladou tamén a
importancia de apostar pola transformación e pola calidade como xeito de
revalorizar os nosos produtos, como fai a SAT obxecto da visita. Por
iso, sinalou, é importante darlle valor ao noso leite, como produto
exquisito.
E precisamente pola importancia do sector para Galicia,
a Xunta fai un esforzo inxente para apoialo ano tras ano. Así, neste
2019 a Consellería do Medio Rural destina 42 millóns de euros nas axudas
para o apoio aos investimentos nas explotacións agrícolas (coñecidos
como plans de mellora), para a creación de empresas por persoas
agricultoras mozas e para o desenvolvemento de pequenas explotacións.
A
maiores, cómpre resaltar que está en marcha a Estratexia de
dinamización do sector lácteo, contando con todos e cada un dos axentes
implicados, que ten por obxectivo facer fronte a retos como a súa
profesionalización, a rendibilidade das explotacións, a mellora da súa
base territorial ou a reforma da Política Agrícola Comunitaria. De
feito, o grupo de traballo está mantendo reunións de maneira periódica
co fin de analizar a situación do sector. En concreto, a día de hoxe
estase avaliando o remuda xeracional nas explotacións, a reorientación
da produción e xeración de valor na cadea e a promoción dos produtos
lácteos.
SAT A Campa
A SAT A Campa é unha empresa familiar
orientada á produción de leite, que conta cunhas 80 hectáreas de
cultivos forraxeiros. A súa produción é duns 1,7 millóns de litros cun
censo de 324 animais. Ademais, os seus socios xestionan tamén a granxa
El Pilar con 300 cabezas de gando e a queixería SAT Queinaga.