A directora xeral de Pesca, Acuicultura e Innovación Tecnolóxica,
Mercedes Rodríguez, destacou hoxe na Guarda que a Xunta busca “facer
atractiva a actividade da cadea mar-industria ás novas xeracións a
través da Formación Profesional Dual”. Este proxecto, detallou a
directora xeral, “aglutina os intereses da xuventude que aposta por este
tipo de formación como o paso previo á súa inserción laboral, a
experiencia da comunidade educativa e as necesidades da industria do
mar”.
Así o sinalou durante a inauguración das VI Xornadas
internacionais de pesca sobre grandes migradores, onde tamén explicou
que coa FP Dual o Goberno galego busca “mellorar a formación enfocada ao
sector pesqueiro, garantir o relevo xeracional e evitar a falta de
tripulación”. Un obxectivos, engadiu Mercedes Rodríguez, polos que a
Consellería do Mar vén apostando. Neste sentido lembrou que este ano no
eido da formación o orzamento volveu medrar, superando o 4% de suba e os
nove millóns de euros e que desde o 2015 o incremento é do 32%. Este
esforzo orzamentario, explicou a directora xeral, compleméntase cun
incremento da partida destinada á incorporación de xente nova ao mundo
pesqueiro, en máis do 25%.
Ademais lembrou que nos últimos 10 anos
saíron dos centros de formación dependentes da Consellería do Mar preto
de 1.570 titulados profesionais en ensinanzas marítimo-pesqueiras con
atribucións para exercer mando en buques de altura. Nesta liña Mercedes
Rodríguez incidiu en que a Xunta defende unha formación que cumpra co
dobre obxectivo de afianzar a capacitación e a experimentación práctica e
de dotar as adecuadas atribucións, competencias e aptitudes aos futuros
profesionais do mar.
Esta aposta da Xunta tamén se reflicte nas
propostas que fai Galicia de cara ao futuro Fondo Europeo Marítimo e de
Pesca (FEMP) para o que a comunidade autónoma galega defende a
incorporación de medidas coa mirada posta na renovación da frota.
Medidas, especificou, “que axuden a facer dun barco un lugar máis
acolledor e atractivo. É dicir barcos máis conectados, posibilitando o
uso do internet e dunha comunicación diaria con terra e máis habitables,
coas condicións laborais e de seguridade a bordo melloradas”.
As xornadas
Esta
sexta edición das Xornadas internacionais de pesca sobre grandes
migradores da Organización de Palangreiros Guardeses (ORPAGU) estará
centrada nas titulación náutico-pesqueiras e a forma de mellorar as
condicións de vida a bordo para impulsar o relevo xeneracional. Estas
cuestións serán abordadas a través de diferentes mesas redondas, unha
parte na que tamén participará a directora xeral de Pesca, Acuicultura e
Innovación Tecnolóxica, que intervirá na mesa redonda relacionada coa
mellora das condicións de vida a bordo dos buques.