FÚTBOL GAÉLICO
O BNG pide á Xunta apoio ás seleccións deportivas nacionais e a súa participación en competicións internacionais
O BNG leva ao Parlamento
iniciativas para que o Goberno galego fomente as seleccións deportivas
nacionais e apoie a súa participación en competicións internacionais, ao tempo
que tamén demanda do Executivo de Feixóo apoio para as seleccións nacionais
masculina e feminina de fútbol gaélico que están na elite mundial deste deporte.
Neste sentido, e con motivo da
participación das seleccións nacionais masculina e feminina nos GAA Word Games, -campionatos do mundo de
fútbol gaélico en Waterford e Dublín
entre o 28 de xullo e o 1 de agosto-, o BNG amosa todo o seu apoio aos
combinados nacionais galegos e deséxalles os mellores éxitos para que sigan sumando
logros internacionais.
Cómpre lembrar que esta participación
vén precedida dun moi bo resultado no anterior mundial, no que a selección
feminina obtivo o primeiro posto mentres que a masculina lograba o
subcampionato no europeo de fútbol gaélico de 2018 en Lorient (Bretaña).
Pese a esta brillante traxectoria
internacional, as seleccións nacionais de fútbol gaélico non contan co
necesario apoio institucional do Goberno da Xunta, o que obriga aos combinados
galegos a depender de patrocinios privados, de colaboracións de concellos e
dunha campaña de recadación de achegas particulares.
Para rematar con esta situación, o BNG presenta no Parlamento iniciativas para
que a Xunta promova as seleccións galegas e apoie economicamente a
participación dos combinados nacionais en competicións internacionais. “Para o BNG as seleccións deportivas
galegas son un símbolo da identidade nacional, da cohesión social, da
autoestima e da capacidade de Galiza como pobo. A súa proxección e éxito internacional
fai que actúen como embaixadoras do noso país e trasladen ao mundo unha imaxe
positiva do que somos e do noso inmenso potencial colectivo”, salienta o
deputado Luís Bará, promotor das iniciativas no Cámara galega. Departamento de comunicación