O presidente da Xunta, Núñez
Feijóo, informou hoxe na rolda de prensa do Consello da Xunta da
aprobación do Plan de atención ás persoas sen fogar 2019-2023, que
destinará máis de 73M€ nos próximos cinco anos a abordar a situación
deste colectivo, pasando de case un 40% máis que nos cinco exercicios
anteriores. Isto supón pasar de 53 a 73 millóns de euros, 4 millóns máis
cada ano.
Feijóo destacou que é “a primeira vez que se aproba en
Galicia un plan destas características”, e sinalou que este documento
refírese ás persoas sen fogar que viven na rúa, ás usuarias de albergues
ou outras institucións sociais e as que residen en vivendas inseguras
ou inadecuadas. Neste sentido, o presidente recordou que para
obter unha radiografía precisa desta situación, a Xunta encargou un
Estudo sobre a situación das persoas sen fogar en Galicia, para o que se
contou co traballo de voluntarios da Cruz Vermella que fixeron máis de
200 entrevistas; e con achegas das demais entidades sociais coas que se
realizou un seminario e un panel de expertos para poñer en común
solucións.
Desta maneira, salientou e agradeceu o traballo
conxunto entre Xunta, entidades sociais e concellos para o
desenvolvemento deste Plan de atención ás persoas que ten como
obxectivo, dixo, “intentar diminuír as dificultades que aínda existen en
Galicia para unhas 1900 persoas sen fogar, que é o censo actualizado
que temos a data de hoxe”. E recordou ademais que nos vindeiros meses
“volveremos a apelar a este consenso para actualizar a Axenda Social”.
100 medidas
Feijóo
sinalou que o Plan de atención ás persoas sen fogar incorpora 100
medidas, entre as que destacou algunhas das principais coma no ámbito
dos recursos de atención, que se cuadriplicarán o número de prazas,
pasando de 18 a 69; e no eido da prevención, a coa ampliación do
proxecto Nelson Mandela ao cárcere da Lama, e o impulso a programas de
intermediación inmobiliaria.
No referente á sensibilización,
explicou que se creará un sitio web que traslade á sociedade galega
información sobre a situación deste colectivo; no ámbito da educación
aumentarase o coñecemento da situación das persoas sen fogar entre a
poboación escolar; e no eido da igualdade, elaborarase un estudo sobre a
situación específica das mulleres sen fogar e porase en marcha un
proxecto de acompañamento social dirixido a elas.
O presidente
destacou que o plan dedícalle unha atención especial área de vivenda,
para o que se prevé a posta á disposición de 100 vivendas para o
aloxamento de persoas sen fogar este ano, onde se empregas as políticas
de rehabilitación da Xunta de Galicia co deseño dun plan de
rehabilitación dunha parte importante do patrimonio rural, as antigas
vivendas de mestres ou doutros oficios, ademais doutras casas de
titularidade municipal que estean en desuso.
No respectivo á
atención sanitaria, salientou que se aplicarán tres grandes medidas:
tarxeta sanitaria para todas as persoas sen fogar empadroadas en
Galicia, estableceranse vías de preferencia na atención ás persoas sen
fogar con enfermidade mental e impulsarase proxectos de acción
comunitaria para a prevención e vixilancia da saúde das persoas sen
fogar.
O presidente da Xunta concluíu incidindo en que se pecha
“un plan ambicioso, e estamos moi satisfeitos do nivel de colaboración
das entidades de iniciativa social e de toda a rede de loita contra a
pobreza en Galicia, porque realmente eles son os artífices e
protagonistas deste plan que acredita a solidariedade de Galicia con
esta poboación”.