A Estación de Viticultura e Enoloxía de Galicia (Evega), dependente
da Consellería do Medio Rural, acaba de recibir o terceiro premio ao
mellor traballo científico presentado como comunicación oral, no marco
do 11º Congreso Internacional de Enfermidades da Madeira da Vide que se
celebrou en Penticton (Canadá). Este traballo forma parte dunha tese
doutoral que se desenvolve na Evega, en colaboración co Instituto de la
Ciencia de la Vid y del Vino (ICVV) de Logroño.
Neste estudo
investigáronse as porcentaxes de infección por patóxenos fúnxicos
asociados a enfermidades da madeira da vide, que se producen de forma
natural tras a realización da poda. Esta análise levouse a cabo en seis
viñedos galegos localizados nos concellos ourensáns de Leiro e do Barco
de Valdeorras e no pontevedrés de Ribadumia, mediante a técnica de
secuenciación masiva.
Os resultados acadados mostran que a
avaliación das infeccións naturais producidas nas feridas de poda en
distintos momentos da parada vexetativa da vide impóñense como un método
idóneo para optimizar medidas de prevención e control das enfermidades
da madeira da vide. Así, observouse que a infección por fungos asociados
a este tipo de enfermidades é, en xeral, moi baixa tras unha poda
temperá realizada a mediados do outono (novembro), mentres que aumenta
significativamente tras unha poda tardía realizada a finais do inverno
(febreiro).
Tendo en conta estes resultados preliminares, baixo as
condicións ambientais e para as zonas de estudo concretas de Galicia,
recoméndase a realización dunha poda temperá entre os meses de novembro e
febreiro, en combinación con outras medidas de control co fin de
reducir ao máximo as infeccións de fungos causantes de enfermidades da
madeira da vide. Polo momento, os resultados obtidos son parciais e
deben ser adaptados a cada zona de cultivo para a aplicación adecuada
desta medida de prevención e control.