GALICIA | POLÍTICA
Gonzalo Caballero presenta un proxecto centrado na "cercanía á cidadanía"
O secretario xeral do PSdeG-PSOE, Gonzalo Caballero, anunciou hoxe un
proxecto centrado na “cercanía á cidadanía, a confrontación co modelo
esgotado de Feijóo e a construción dun proxecto en positivo que atenda
ás necesidades dos galegos e das galegas”. O líder socialista reuniu
hoxe á Comisión Permanente do partido para debullar a estratexia
política de cara aos próximos meses.
Caballero sinalou
que os socialistas galegos teñen a día de hoxe “toda a intensidade
política activada para afrontar calquera escenario político electoral en
España e Galicia” nos vindeiros meses. O obxectivo, explicou, é
dispoñer dunha “alternativa en marcha para conectar coa maioría das
galegas e dos galegos e motivar e activar ao electorado progresista
fronte a calquera escenario electoral”.
Anunciou un
“traballo a pé de país” nunha “campaña de proximidade e cercanía coa
cidadanía galega”, para facerlle chegar un “proxecto en positivo” fronte
a unha dereita representada por Feijóo que “esmorece, cun proxecto
esgotado”. Criticou a estratexia dos conservadores, centrados en
“ancorarse ao poder institucional da Xunta para resistir os novos tempos
políticos dunha cidadanía que xa lle deu as costas”.
Un
PP, dixo, que padece en Galicia tamén as consecuencias dun proxecto
“roto” en España, e que responde coa “complicidade” de Feijóo á viraxe
de Casado á “dereita máis rancia que incomoda aos seus electores”. Por
iso o presidente da Xunta “utiliza o cinismo para dicir unha cousa
distinta cada vez: un día aplaude os pactos con Vox e outro quere buscar
o centro moderado”.
Sinalou que o propio Feijóo é
“consciente de que o PP ten moitos problemas”, como demostra a
designación de Álvarez de Toledo como portavoz, co que “o PP abandona a
moderación e deixa ao PSOE o centro e a esquerda política, da moderación
e do progreso”.
Alcoa
O líder dos
socialistas galegos aplaudiu hoxe o anuncio do acordo coñecido onte
entre Parter e Alcoa, que permitirá que os traballadores das plantas de A
Coruña e Avilés manteñan os seus empregos logo dunha etapa “moi
complexa”. Gonzalo Caballero sinalou que tanto o goberno de España como o
PSOE estiveran “a carón dos traballadores da planta” para buscar unha
saída á crise que deixara o PP.
Esixiulle neste sentido ao presidente da Xunta “unha desculpa aos
traballadores de Alcoa e a tódolos galegos e galegas” por renunciar a
cooperar para buscar unha saída “por unha estratexia de confrontación”.
Sinalou tamén as declaracións “gravísimas” do conselleiro de industria,
que “en vez de alegrarse e amosarse satisfeito, prefire poñer paus nas
rodas do avance e da solución”.
Acusou ao presidente da
Xunta de presentarse como “agoreiro do desastre” dende que se coñeceu o
peche da planta en outubro, en lugar de “traballar lealmente para
resolver unha crise industrial que deixaron herdada”. Reclamoulle
“humildade para pedirlle desculpas aos traballadores de Alcoa polos seus
erros e aos galegos e galegas por poñer os seus intereses por riba dos
intereses da cidadanía galega”.
Advertiu que “enganou a
Galicia” na súa obsesión por “confrontar co goberno sen traballar a
favor do país”, que deixa “cunha caída do Índice de Produción Industrial
–no mes de maio de 2019- como non houbo en moito tempo”, e sendo a
Comunidade Autónoma coa maior caída do IPI de acordo co INE. Departamento de comunicación