GALICIA | CAMPAMENTOS DE VERÁN 2020
Fabiola García asegura asegura que os campamentos de verán de 2020 serán "os mellores da historia" de Galicia
A conselleira de Política Social, Fabiola
García, anunciou hoxe que os campamentos de verán da Xunta de
Galicia do 2020 serán “os mellores da historia”. Díxoo durante unha
visita ás rapazas e rapaces que desde o pasado venres e ata o próximo
domingo desfrutan no campamento xuvenil Virxe de Loreto, en Porto do
Son.
Fabiola García asegurou que os campamentos enmarcados na
Campaña de Verán, ademais de ser un gran recurso de conciliación para as
familias, tamén contribúen á educación nos valores que deben definir á
Galicia do futuro: a empatía e o respecto polos demais e polo medio
ambiente e o mantemento dun estilo de vida saudable. Por iso, indicou
que a Xunta de Galicia traballa xa para que no 2020 a programación
estival, que volveu medrar este ano, bata todos os récords con máis
prazas, mellores instalacións e cunha mellor atención.
Nesta
quenda do campamento xuvenil de Virxe de Loreto son 120 as mozas e mozos
que desfrutan da experiencia. Ao longo das catro quendas que se
desenvolverán en todo o verán, o número de rapazas e rapazas acadará os
420. Neste espazo realizan actividades como escalada, bicicleta de
montaña, tiro con arco, surf ou kaiak, así como aprenden habilidades de
orientación e primeiros auxilios.
10.000 prazas en toda Galicia
A Campaña de Verán 2019, baixo a lenda O verán que queres vivir
achega á mocidade 10.000 prazas. A proposta de actividades para esta
tempada estival inclúe campamentos, programas de intercambios con outras
comunidades autónomas, actividades concertadas, actividades para
maiores de 18 anos e campos de voluntariado.
Nestas actividades
participan mozas e mozos a partir dos 9 anos e ata os 30. Todos os
campamentos están abertos a persoas con discapacidade, e ademais este
colectivo ten unha convocatoria específica para persoas de entre 11 e 40
anos. Así mesmo, hai 100 prazas reservadas para menores de idade que
están baixo o sistema de protección da Xunta e outras 52 para fillas e
fillos de mulleres vítimas de violencia de xénero.
Esta campaña de
verán incorpora tres novos campamentos dos 21 que ofrece: Aldea Perdida
na Granxa Zoo de Grixalba, en Sobrado dos Monxes; outro sobre
astronomía no albergue de San Xoán de Río, en Ourense; e un novo
campamento tecnolóxico nas instalacións xuvenís de Gandarío titulado Adestrando o meu robot.
Campos de voluntariado
Este
ano tamén se incrementa o número de campos de voluntariado, os que se
coñecían como campos de traballo, ata os 30 e con cinco propostas novas:
A terra que habita no mar, no concello do Grove; outro de protección e
recuperación das dunas de Corrubedo, en Ribeira; un terceiro de temática
ambiental en Manzaneda; un campo en Ourense denominado Riós, una mar de
castiñeiros; e por último, o primeiro campo de voluntariado
intermunicipal que leva por nome Vía Xacobea: vía da prata e que se
celebrará en Boqueixón e Vedra. Desta maneira, os campos de
voluntariado en Galicia que pon en marcha a Xunta para este verán
conteñen 643 prazas, 40 máis das que había á disposición da mocidade no
2018.