A Xunta vén de ampliar o orzamento da
liña de axudas para que os concellos desenvolvan iniciativas de fomento
da conciliación tras a alta demanda rexistrada. Tendo en conta este
incremento, o investimento destinado a estas axudas ascende a preto dun
millón de euros, o que permitirá financiar accións en case un cento de
concellos galegos.
Así o explicou hoxe o vicepresidente da Xunta,
Alfonso Rueda, durante a súa visita á ludoteca de Tenorio en
Cerdedo-Cotobade, que se financia grazas a esta convocatoria cunha axuda
concedida de algo máis de 13.000 euros. A actividade de conciliación
desenvólvese, ademais de en Tenorio, en Carballedo e Cerdedo. Na visita
estivo acompañado pola secretaria xeral da Igualdade, Susana López
Abella, e polo delegado territorial da Xunta en Pontevedra, José Manuel
Cores Tourís. A liña de conciliación inclúese nunha convocatoria
máis ampla destinada aos concellos para financiar outras accións como os
Centros de Información á Muller ou outros programas relacionados co
igualdade. A convocatoria ten, na súa totalidade, un orzamento duns 5,6
millóns de euros.
A Xunta mantén un firme compromiso coa
conciliación. Foi a primeira comunidade autónoma en dotarse dun Plan de
conciliación e corresponsabilidade, aprobado o ano pasado. Ademais, ten
en marcha outras iniciativas como as axudas aos pais ou familias
monoparentais que se acollan á redución de xornada; implantou medidas de
teletraballo e flexibilidade entre o persoal funcionario da Xunta; e
habilita todos os anos unha liña de conciliación dentro do programa
Emega de fomento do emprendemento feminino.
Campo de voluntariado
Ademais
da ludoteca, o vicepresidente da Xunta aproveitou a súa visita ao
concello para achegarse ata o campo de voluntariado internacional de
Cerdedo-Cotobade, onde os voluntarios están a gravar unha curtametraxe
sobre a situación da muller no rural, ademais de realizar outras
actividades de convivencia como sendeirismo, excursións e actividades
acuáticas.
Este ano, por primeira vez e ao abeiro do Pacto de
Estado contra a Violencia de Xénero, estanse desenvolvendo unha serie de
accións específicas nos campamentos e campos de voluntariado da Xunta
para previr e loitar contra a violencia de xénero e promover unha
sociedade máis igualitaria.