ABANCA é signatario fundador dos Principios de Banca Responsable de
Nacións Unidas, unha iniciativa que ten como obxectivo aliñar a
actuación dos bancos coa consecución dos Obxectivos de Desenvolvemento
Sustentable de Nacións Unidas e o Acordo de París sobre o cambio
climático. Os Principios foron desenvolvidos pola Iniciativa
Financeira do Programa das Nacións Unidas para o Medio Ambiente (UNEP
FI), xunto cun grupo central de 30 bancos.
Ao adherirse a UNEP
FI, as institucións financeiras recoñecen abertamente o seu papel activo
na creación dunha economía sustentable e comprométense a integrar as
consideracións ambientais e sociais nas súas operacións. Estes
principios representan o primeiro marco mundial do sector para
incorporar a sustentabilidade tanto en todas as áreas do negocio
bancario -desde a estratexia ata a xestión- como nas relacións de todos
os directivos e empregados cos seus respectivos grupos de interese .
ABANCA adhírese a esta iniciativa no marco da súa estratexia de
Responsabilidade Social Corporativa e intensificará as súas actuacións
no ámbito dos Obxectivos de Desenvolvemento Sustentable (ODS) e o Acordo
sobre o Clima de París. Neste sentido, xa en 2017, ABANCA sumouse á
campaña #Companies4SDGs co propósito de enfocar a súa estratexia de
responsabilidade social para contribuír a alcanzar as metas establecidas
na Axenda 2030.
“A responsabilidade social corporativa é unha
prioridade estratéxica para ABANCA e o noso obxectivo é fomentar sempre
accións que sirvan de impulso para a mellora social e o crecemento
sustentable e que vaian en consonancia cos dez principios do Pacto
Mundial e cos Obxectivos de Desenvolvemento Sustentable aprobados por
Nacións Unidas. Por iso, non dubidamos en sumarnos a esta nova
iniciativa de Principios de Banca Responsable que vai en liña co noso
modelo de banca responsable e sustentable”, sinala Francisco Botas,
conselleiro delegado de ABANCA.
Nos últimos meses ABANCA deu un
novo impulso á aplicación de criterios de responsabilidade social na súa
actividade de negocio e de goberno corporativo. A entidade incorporou
prácticas de gobernanza esixidas a sociedades cotizadas e en abril
lanzou ao mercado Alpha Responsable, un servizo de xestión de carteiras
de fondos de investimento socialmente responsables. Así mesmo, o banco
participa en proxectos do Plan Nacional Integrado de Enerxía e Clima
(PNIEC), en proxectos de enerxías renovables Power Purchase Agreement
(PPA) en colaboración con grandes empresas, e noutros proxectos verdes
enfocados á renovación da frota pesqueira e de mellora da eficiencia
enerxética do sector primario. Ademais, a entidade está renovado as súas
sedes corporativas e a súa rede de oficinas para facelas
enerxeticamente intelixentes e implantou políticas de transporte
sustentable e de cero papel.
Principios de Banca Responsable
Os
Principios de Banca Responsable lanzáronse o 26 de novembro de 2018 en
París, impulsados pola UNEP FI e 30 bancos. Tras un período de consulta
pública global, e da progresiva adhesión de máis entidades financeiras, a
firma definitiva realizarase o 22 de setembro de 2019 na sede de
Nacións Unidas en Nova York.
O seis Principios de Banca
Responsable definen o compromiso e as responsabilidades do sector
financeiro para contribuír a un futuro sustentable, en liña cos ODS e os
Acordos de París sobre cambio climático, fixando un estándar mundial
sobre o que implica ser un banco responsable.