LUGO
A gastronomía lucense acompañará á La Vuelta 2019 cun stand da campaña "...E para comer, Lugo"
La Vuelta 2019 constituirá unha vez máis
“unha gran oportunidade para a difusión da marca Galicia no seu conxunto
e de Lugo e da súa provincia en particular” grazas á campaña “...E para
comer, Lugo”, que acompañará á caravana instalando un stand con
produtos gastronómicos da provincia na saída de cada etapa.
Así o
afirmou hoxe o delegado territorial da Xunta en Lugo, José Manuel
Balseiro, na presentación desta iniciativa, na que tamén participou o
presidente da Asociación Provincial de Empresarios da Hostalería de Lugo
(APEHL), José Francisco Real. Balseiro lembrou que se reedita por
oitavo ano consecutivo esta acción de promoción que “é posible grazas ao
acordo entre a Xunta, a través da Consellería de Cultura e Turismo, a
APEHL e Unipublic, a entidade organizadora da Volta”.
Balseiro
quixo destacar a “colaboración fundamental dos produtores do sector
agroalimentario, que son os que achegan a materia prima de calidade
sobre a que pivota esta acción de difusión”. Grazas a eles, afirmou,
“conseguimos nestes anos que milleiros de persoas de practicamente todo o
Estado tiveran ocasión de achegarse á nosa gastronomía, ademais da
potencial repercusión de estar presentes nunha das probas deportivas
máis seguidas no mundo enteiro, que se retransmite en máis de 150
países”.
A campaña fai un labor de difusión turística da provincia
e de promoción comercial dos produtos alimentarios lucenses, “que son
fundamentais para a nosa economía e a nosa gastronomía, e envían a
mensaxe de calidade que queremos vincular coa nosa identidade e a nosa
oferta turística”, asegurou o delegado.
O presidente da Apehl
subliñou que “a promoción da provincia que se está a facer con esta
campaña no exterior está sendo un éxito”, e lembrou tamén a colaboración
da Asociación de Cociñeiros da Mariña que, ao igual que o ano pasado,
participará en varias etapas elaborando distintos pratos e
presentacións.
Os produtores implicados na campaña son: ABSA
bonito de Armadores de Burela, AFAPAN (fabricantes de pan), Asoporcel
(porco celta), Asovega (cordeiro raza ovella galega) e Avimos (galiña de
Mos); os concellos reguladores das denominacións de orixe de
Arzúa-Ulloa, queixo do Cebreiro, queixo de tetilla, San Simón da Costa e
Ribeira Sacra; os produtos de Indicación Xeográfica Protexida fabas de
Lourenza, pementos de Mougán, castañas, grelos, mel e pataca de
Galicia; o aceite de Quiroga, gallegas Daveiga, Terneira Suprema e carne
de Rubia Galega, e Leite 100% galega. La vuelta