GALICIA | UNIVERSIDADES PÚBLICAS
A Xunta axudará ás universidades públicas galegas a impulsar proxectos de enerxías renovables e eficiencia
A Xunta porá en marcha unha nova liña de
axudas dirixida ás universidades públicas galegas (A Coruña, Santiago
de Compostela e Vigo) para impulsar proxectos de enerxías renovables
térmicas e de aforro e eficiencia enerxética que lle permitirán un
aforro de 600.000 euros ao ano na factura, o que supón ao redor do 6%.
A
convocatoria, que se publicará mañá no Diario Oficial de Galicia (DOG) e
que manterá aberto o prazo de solicitudes ata o vindeiro 13 de
novembro, realizarase en réxime de concorrencia competitiva e contará
cun orzamento total, por parte da Xunta, de 6,3M€ para desenvolver
accións por un valor de 8 millóns.
En concreto, a Consellería de
Economía, Emprego e Industria, a través do Inega, ofrece axudas para
proxectos de enerxías renovables térmicas -ás que se destinan o 16,25%
do orzamento e que poderán incluír instalacións de biomasa, aerotermia,
xeotermia, solar térmica ou iniciativas de district heating- e proxectos
integrais de aforro e eficiencia enerxética. Esta liña conta co 83,75%
do orzamento total e esixirá que as propostas que se aproben impliquen
niveis de aforro, con respecto á situación inicial, de máis do 15%.
Incluirá a renovación de elementos construtivos ou de equipos e
instalacións; a incorporación de sistemas de control e xestión
enerxética; así como certificados de eficiencia e auditorías.
Con
esta convocatoria, a Xunta pretende desenvolver actuacións nunha vintena
de edificios que se beneficiarán non só dun importante aforro
económico, senón tamén enerxético, que equivale a 0,6 millóns de litros
de gasóleo anuais. Ademais, evitarase a emisión de 1.400 toneladas de
CO2 ao ano, semellante á acción de 70.000 árbores. Con esta nova
medida, o Goberno autonómico continúa a súa aposta polas enerxías
renovables e por implantar unha cultura do aforro enerxético en todos os
eidos, desde os cidadáns, ás empresas, pasando polas administracións.
As axudas enmárcanse no Plan de aforro e eficiencia enerxética da
administración pública 2015-2020 que xa leva impulsado actuacións por un
importe de máis de 19 millóns de euros e que permitiu desenvolver 864
proxectos nos concellos galegos e 45 en edificios públicos da Xunta.
Entre eles destacan a nova instalación de autoconsumo solar de San
Lázaro, con 1173 paneis fotovoltaicos e un aforro anual de 50.000 euros;
ou a rehabilitación exterior de San Caetano que incorporou novos
tellados de tella galega, máis de 1.100 fiestras illadas con madeira de
castiñeiro, unha nova envolvente térmica e iluminación led.
Por
outra banda, as tres universidades públicas galegas foron incluídas no
contrato centralizado da Rede de Enerxía da Xunta de Galicia (Redexga)
que foi creada no 2013 e que, desde entón, leva permitido un aforro de
34,2 millóns de euros. O novo contrato abrangue 1790 centros públicos e
conta cun orzamento de 82,6M€ para os vindeiros dous anos.