GALICIA | SOGAMA
Sogama repartiu máis de 3.000 composteiros entre 77 entidades coruñesas
CERCEDA | No
marco do seu programa de compostaxe doméstica, a Sociedade Galega do
Medio Ambiente repartiu de forma gratuita 3.050 composteiros na
provincia da Coruña; concretamente, en 77 entidades (34 concellos, 34
centros educativos e 9 colectivos sociais). Con
esta iniciativa, a empresa pública adscrita á Consellería de Medio
Ambiente pretende promover a reciclaxe da materia orgánica en orixe e
axudar aos entes locais a cumprir os obxectivos europeos na recuperación
desta fracción de lixo.
Así
mesmo, conta nas súas dependencias de Cerceda cunha planta de
compostaxe industrial que xa está dando servizo aos concellos veciños de
Laracha, Carballo e Cerceda, os cales implantaron nos seus respectivos
termos municipais o denominado quinto contedor (de cor marrón),
destinado a acoller os restos orgánicos recollidos de forma selectiva
para a súa posterior transformación en compost. Unha modalidade que
combinan, nos tres casos, coa compostaxe doméstica nas zonas máis rurais
a fin de completar o ciclo de recuperación da materia orgánica e poñela
en valor mediante a súa transformación nun abono natural con excelentes
propiedades fertilizantes para o solo.
Con
capacidade para 15.000 toneladas anuais, a planta de compostaxe de
Sogama está a disposición dos municipios máis próximos para que
trasladen á mesma a materia orgánica recollida a través do contedor
marrón.
Máis
aló dos beneficios ambientais, que constitúen unha prioridade para os
tres concellos, a compostaxe reporta tamén interesantes vantaxes
económicas e sociais pola oportunidade que representa para reducir a
cantidade de refugallos depositados nos contedores verdes convencionais
e, xa que logo, o importe da factura que deben pagar a Sogama, así como
os propios custos asociados á recollida e o transporte.
A fin de que os
participantes poidan dispoñer dos coñecementos necesarios na
autocompostaxe, Sogama imparte cursos de formación e edita material
didáctico de apoio no que se describen os pasos a seguir. Así mesmo,
habilitou no seu momento un sitio web de consulta www.compostaconsogama.gal no que os internautas teñen a oportunidade de acceder a recursos divulgativos de interese.