A Galega estrea este mércores "A Casa de 1906", un ?docu-show? sobre a convivencia de dúas familias

Os concursantes viaxarán cen anos atrás no tempo

O novo programa da Galega, 'A Casa de 1906', poderá seguirse a partir deste mércores pola noite. 'A Casa de 1906' amosará a convivencia de dúas familias galegas actuais en casas pareadas coma se vivisen en 1906. Nin auga corrente, nin luz, e moito menos, internet, os participantes deberán traballar para conseguir o seu propio alimento. O director xerente da Televisión de Galicia, Xesús Iglesias, preferiu falar de 'docu-show' en lugar de 'reality', xa que se trata dun "formato cultural" importado da Channel 4 británica, onde xa leva oito anos de emisión, e cun "éxito garantido". Iglesias confía na continuidade deste formato e formular novos retos como "a casa dos romanos ou a casa dos celtas". O presidente de Filmanova, Antón Reixa, e o de Continental, Pancho Casal, coincidiron á hora de propoñerlle este novo produto ao ente público galego. Reixa afirmou que "poucas veces poden confluír tantos elementos interesantes" para unha televisión pública, como son a proximidade, a divulgación e o entretemento. 'A Casa de 1906' contou co apoio de Augas de Cabreiroá, cando se cumpre un século do seu recoñecemento como "auga de utilidade pública". O espazo elixido para gravar durante sete semanas a vida das dúas familias foi o concello coruñés de Irixoa. Alí viviron en vivendas de época que tiveron que ser reconstruídas para adaptalas ás condicións de hai un século. E é que se trata dunha "experiencia real" na que, a diferencia de programas como 'Gran Hermano', non interveñen os guionistas. Familias Ao 'casting' presentáronse moitas persoas de xeito individual e familias con fillos "demasiado pequenos" para participar, segundo sinalaron os seus produtores. As familias seleccionadas proceden de Padrón e A Coruña e están compostas por cinco e seis membros respectivamente, que representan as distintas franxas de idade. "E curioso, pero quen máis botou internet foi a familia de Padrón", salientou Reixa. Algún fillo estivo a piques de abandonar a experiencia no primeiro día. Mentres, os fumadores botaron de menos o tabaco 'prefabricado' e todos sufriron a falta de papel hixiénico. "Trátase de persoas moi especiais e motivadas" definiunas Reixa. A familia que supere "as duras condicións" ás que se enfrontarán recibirá como premio unha semana nunha casa do Caribe. O público irá decidindo ó longo dos programas quén merece o premio, e por participar poderá recibir entre 1.000 e 2.000 euros. Durante dez semanas, 'A Casa de 1906' recibirá un tratamento especial en 'Luar' e emitirase en espazos de media hora os mércores, xoves e venres ás 21.30. O director xerente da TVG salientou a aposta da televisión autonómica pola franxa horaria que ocupará 'A Casa de 1906', dirixida a todos os públicos. Neste senso, adiantou a próxima estrea en febreiro dunha serie de programas divulgativos da Historia de Galicia de media hora de duración que se emitirá tamén no acceso ao prime time e lembrou a audiencia de programas como 'Zapping Comando' e 'Alalá'. Ademais informou de que se está traballando nun novo programa sobre pesca que se chamará 'Hai que mollarse'.