PSdeG
Besteiro: "Os socialistas apostamos por concellos máis transparentes"
O
secretario xeral dos socialistas galegos, José Ramón Gómez
Besteiro, manifestou hoxe que o PSdeG traballará nos concellos “para
facelos máis transparentes, sostibles e cun financiamento suficiente
para prestar servizos básicos aos seus veciños”.
“Fronte
a visión raquítica da dereita, nós temos unha visión ampla e
social da vida municipal na que apostamos por involucrar á cidadanía
na súa xestión, queremos concellos que sexan capaces de activar
políticas de loita contra o desemprego e ben atendidos máis aló do
seu tamaño ou o seu carácter rural”, asegurou o líder dos
socialistas no Comité Nacional Galego do PSdeG.
Na
súa intervención,
demandou aos militantes “propoñer unha alternativa clara e crible
para as nosas cidades e vilas que sexa atractiva para todas as
persoas que reclaman solvencia, seriedade e compromiso social na
xestión das súas vilas e cidades”, desenmascarando así á
dereita, “que está a acabar co noso sector público baixo
argumentos falaces”.
“Somos
un partido que representa os valores do municipalismo como sinónimo
de comunidade, de solidariedade e o apoio mutuo, esta idea social das
nosas vilas e cidades está en risco polo continuo ataque da dereita
aos concellos a través de reformas lexislativas inxustas”,
afirmou.
Besteiro
considera que “a nosa xestión municipal ten que servir como
primeira barreira de protección social ante as consecuencias das
políticas do Partido Popular que desgraciadamente todos coñecemos e
sufrimos, xa que a dereita de Feijóo ve as cidades como meros
encraves de poder partidista”.
“A
dereita sabe que é débil nos concellos e
sabe que é débil no man a man co cidadán, por iso reacciona con
involución democrática, tutela, recentralización, desigualdade,
privatización, perda do benestar, precariedade no emprego e anemia
dos servizos públicos”, aseverou.
En
opinión do secretario xeral do PSdeG, “non
podemos permitir que a dereita volva a gobernar nunha administración
na que non cre, temos que traballar e afondar no noso modelo social
de cidade, desde os concellos é desde onde estamos mellor
capacitados para exercer de contrapoder ás políticas empobrecedoras
da dereita de Feijóo”.
“Os
socialistas temos experiencia en desenvolver políticas públicas
municipais que achegaron á cidadanía unha alta calidade de vida, e
o fixemos desde unha única óptica, a diferenza do que fai a
dereita: desde a procura da maior rendibilidade social posible para
os veciños e veciñas”, dixo.
Besteiro
engadiu que “o
cambio en Galicia comeza polo cambio nos concellos galegos, por iso
agora toca traballar e convencer para defender os proxectos que
inclúen aos seus veciños e que levan anos funcionando, reactivando
de novo esas vilas que se quedaron paralizadas no tempo fai catro
anos”.
Candidaturas
No
comité tratouse a aprobación das candidaturas dos concellos de
entre 20.000 e 50.000 habitantes, que son os que dependen do Comité
Nacional (os de máis de 50.000 dependen do Federal e os de menos de
20.000, das secretarías provinciais).
O
PSdeG confirmou que presentará candidaturas en todos estes concellos
medianos, quedando xa aprobadas as listas de Narón, encabezada por
Catalina García, Arteixo (Martín Seco), Ames (José Miñones),
Ribeira (José Manuel Vilas), Cambre (Augusto Rey), Vilagarcía
(Alberto Varela), Redondela (Eduardo Reguera), Marín (María Luz
Reguera) e A Estrada (José Antonio Dono).
En
vindeiras datas coñeceranse oficialmente as de Oleiros, coa proposta
de candidatura de Jorge Pérez, Carballo (Jesús Añón), Culleredo
(Julio Sacristán), Ponteareas (María Jesús Garrote) e Lalín
(Nicolás González), cuxos candidatos e candidatas solicitaron
ampliar o prazo por razóns estratéxicas. Asimesmo, aprobarase o
cabeza de lista e a candidatura definitiva de Cangas.
Contas
do PSdeG
No
relativo a situación económico-financeira do PSdeG, hoxe
quedaron aprobadas no comité as contas do partido. “Podemos dicir
que estamos en condicións de garantir a viabilidade económica do
noso partido por ter superado satisfactoriamente os principais retos
de equilibrio orzamentario e suficiencia económica que hai un ano
nos marcabamos”, apuntou Besteiro.
“A
redución da débeda neste ano superará o 22,5%, cando as previsións
iniciais eran poder chegar ao 17%;
tódalas medidas de austeridade, eficiencia e control adoptadas teñen
demostrado estar na boa dirección acadando un elevado nivel de
cumprimento”, rematou o líder dos socialistas galegos.