O presidente do Goberno galego, Alberto
Núñez Feijóo, adiantou hoxe, na rolda de prensa do Consello, que a
Xunta volverá conxelar as taxas universitarias o vindeiro curso para
que Galicia siga tendo a universidade máis barata de España.
“Galicia é a Comunidade, polo tanto, coas taxas máis reducidas de
España e volverá a selo no próximo curso 2015-2016”, aseverou.
Deste xeito, no caso dos graos
universitarios, o prezo medio, por exemplo, das primeiras matrículas
de grao –que representan un 84,07% do total- mantense en 11,8
euros/crédito, o máis baixo de España fronte aos 33,5
euros/crédito de media doutras comunidades como Cataluña. E tamén
no caso dos máster os prezos son os máis baixos, cunha media de
26,49 euros fronte aos 65,87 euros/crédito de Cataluña.
Conscientes de que este feito ten un
dobre obxectivo: é bo para os estudantes e é bo para Galicia,
Feijóo precisou que a Xunta ten decidido conxelar un curso máis as
matrículas de grao, tanto nas primeiras como nas sucesivas
matrículas e nos másters.
O Goberno galego transmitirá ao
Consello Galego de Universidades esta proposta que fará que os
arredor de 64.000 alumnos que van iniciar unha carreira ou a
continuar os seus estudos universitarios o próximo curso 2015-2016,
non teñan que pagar nin un euro máis respecto a este que está a
piques de rematar.
E Galicia volverá a ser un ano máis a Comunidade
coas taxas universitarias máis baixas.
Feijóo subliñou que con esta
iniciativa dáse continuidade a unha política activa de apoio ao
estudantado universitario. Non en van, ademais da conxelación das
taxas, tamén se convocará un ano máis a liña de axudas para o
inicio e continuación de estudos, dirixida a quen non cumprise os
requisitos académicos adicionais esixidos polo Ministerio.
Mantense
a convocatoria das axudas dirixidas a cubrir as causas imprevistas
que poidan afectar á continuación de estudos universitarios. E
convocarase tamén, como cada ano, a liña específica de axudas para
o inicio de estudos de máster dirixidas a persoas en situación de
desemprego.
“En definitiva, temos un compromiso
inequívoco coa Universidade pública galega para blindar a
accesibilidade e para blindar o obxectivo de que en Galicia se un
rapaz quere estudar na universidade o teña máis fácil que en
calquera outro lugar do país”, aseverou.
Dixitalización das aulas en toda a
ensinanza obrigatoria
Por outra banda, o titular do Executivo
autonómico destacou tamén a activación dunha nova fase do Programa
Abalar para completar a dixitalización das aulas en toda a ensinanza
obrigatoria.
“Estamos a falar de dixitalizar 2.800 aulas de 870
centros públicos, beneficiando a outros 50.000 estudantes. É dicir,
pasar dun 40% de aulas públicas dixitais, que é a situación neste
momento, ao 100% en todos os cursos que conforman a ensinanza
obrigatoria”, explicou, ao que engadiu que, unha vez completada,
esta nova iniciativa permitirá duplicar os alumnos integrados en
Abalar, que superarán os 100.000.
Para acadar estes obxectivos, Feijóo
subliñou que, coa previsión de iniciar a dotación no último
trimestre deste ano, o Consello da Xunta autorizou hoxe a licitación,
por un importe de 11,2 millóns, do contrato de subministración dos
2.800 equipamentos de aulas dixitais, compostos por: encerado dixital
interactivo; vídeo proxector; ordenador portátil para o posto de
profesor; ademais da conectividade da aula.
O responsable autonómico incidiu en
que este novo paso dá continuidade ao Proxecto Abalar, que se vén
desenvolvendo desde o ano 2010 e que aglutina catro eixos:
dixitalización das aulas; formación do profesorado no
aproveitamento das TIC na práctica educativa; uso de recursos
dixitais na aula, cun repositorio de contidos dixitais xa con máis
de 2.300 recursos educativos dixitais complementarios, para educación
infantil, primaria, secundaria, bacharelato e ciclos formativos; e
difusión e emprego das TIC na comunicación, onde máis de 10.000
familias seguen, por exemplo, a actividade educativa a través de
abalarMóbil.
“Avanzamos, polo tanto, para facer
realidade a educación dixital, que fará posible: superar totalmente
a fenda dixital entre zonas rurais e urbanas. E que de cero
estudantes galegos que tiñan esta opción en 2009, se pase ao 100%
dos estudantes de ensinanza obrigatoria”, concluíu, a modo de
resumo.