A Xunta convoca 344 prazas no Sergas
O presidente da Xunta, Alberto Núñez
Feijóo, avanzou hoxe tras o Consello a convocatoria de 344 prazas na
OPE do Sergas para 2015, polo que preto de 5.000 profesionais
sanitarios terán consolidado o seu posto de traballo desde 2009.
No que se refire a persoal licenciado
sanitario: 72 prazas correspóndense a facultativos especialistas de
área de ata 16 especialidades; 42 médicos de familia de atención
primaria; 6 médicos coordinadores e 2 médicos asistenciais da
Fundación Pública Urxencias Sanitarias de Galicia-061; e 4
odontólogos de atención primaria.
En canto a persoal diplomado sanitario
e de formación profesional, 80 prazas son de persoal de enfermaría;
6 de matronas; 6 de fisioterapeutas; 60 de auxiliares de enfermería;
e 26 de técnico de farmacia. E, respecto ao persoal de xestión e
servizos ofértanse: 7 prazas de grupo técnico da función
administrativa; 19 de persoal técnico superior en prevención de
riscos laborais; 3 de técnicos de xestión e 5 técnicos
especialistas de sistemas e tecnoloxías da información; e 6
traballadores sociais.
Durante a rolda de prensa, Feijóo
precisou tamén que as prazas de médico de familia de atención
primaria e de persoal de enfermaría acumularanse á oferta do ano
2013, o que permitirá convocar 82 prazas de médico de familia de
atención primaria e 205 de persoal de enfermaría.
Así mesmo, cómpre salientar que con
carácter xeral, o 50% das que se convoquen en cada categoría
reservaranse para a súa provisión polo sistema de promoción
interna. E, reservaranse unha cota non inferior ao 5% do total das
vacantes ofertadas para ser cubertas entre persoas con discapacidade.
O titular da Xunta concluíu incidindo
en que desde 2009 e contando xa esta OPE de 2015, serán preto de
5.000 os profesionais sanitarios os que terán consolidado o seu
posto de traballo con vínculo de fixeza.