Medio Ambiente iniciará en breve os traballos de protección das praias de Barra e Nerga
A Consellería de Medio Ambiente,Territorio
e Infraestruturas, iniciará nos vindeiros días traballos de protección dos
sistemas dunares das praias de Barra e Nerga, no Concello de Cangas, co fin de
garantir a súa conservación.
O sistema proposto pola Dirección
Xeral de Conservación da Natureza é a instalación dun valado composto de postes
de madeira e arame que evite o paso indiscriminado dos visitantes pola fronte
dunar, pero permitindo ao mesmo tempo o libre acceso dos usuarios da praia.
A actuación que se pretende levar
a cabo está cofinanciada nun 80% polo Fondo Europeo de Desenvolvemento
Rexional, no marco do Programa Operativo FEDER Galicia 2007-2013. Nos últimos anos véñense
producindo no litoral de Galicia unha serie de acontecementos climáticos, con
frecuentes e fortes borrascas e importantes variacións no nivel do mar, que teñen
afectado a práctica totalidade dos hábitats de interese comunitario.
Paralelamente a esta perda dos hábitats,
os visitantes e usuarios das praias invaden estes terreos erosionados, mesmo de
forma lúdica, acelerando o proceso de erosión. Neste sentido, dende o Goberno
galego considérase imprescindible tomar medidas o máis axiña posible para
reforzar os valados de protección alí onde os procesos erosivos tiveron maior
impacto nos hábitats dunares.