Feijóo anuncia unha nova ampliación dos recursos da Risga
O presidente do Goberno galego, Alberto Núñez
Feijóo, anunciou hoxe na rolda de prensa do Consello unha nova ampliación dos
recursos para atender aos beneficiarios da Risga e a decisión de axilizar os
mecanismos para resolver as solicitudes.
Logo de recoñecer que a loita contra a
exclusión social ten sido un dos principais obxectivos do Executivo autonómico,
“e seguirao sendo tamén neste momento”, Feijóo precisou que con esta ampliación
de recursos rematarase o ano cun orzamento de máis de 53 millóns de euros, é
dicir, máis de 5 millóns sobre o previsto ao inicio do ano e un 133% máis que
en 2009, cando o orzamento era de 22,7 millóns.
No tocante á axilización dos mecanismos para
resolver as solicitude, o titular da Xunta afirmou que o obxectivo é que todas
elas se resolvan e notifiquen nun prazo de 60 días, “de forma que poidamos
atender –dixo- todas as solicitudes con dereito xa presentadas no primeiro
semestre do ano e as que se presenten no último semestre do 2015, é dicir, de
xeito que a lista de espera dos solicitantes da Risga sexa cero”.
Con esta iniciativa, Feijóo afirmou que o
Goberno galego renova e reforza o seu compromiso coas persoas perceptoras da
Renda de Inclusión Social, conscientes de que son un colectivo con
dificultades. “Xa o demostramos facendo compatible a percepción da Risga cos
primeiros momentos dun postos de traballo; incrementando todos os anos o
orzamento; e, finalmente, axilizando a tramitación para que a lista de espera
sexa a mínima e garantir a seguridade do proceso, é dicir, unha lista de espera
equivalente na práctica a cero”.
Durante a rolda de prensa, o responsable
autonómico destacou que o pasado ano 2014 pechouse con 12.348 beneficiarios
acumulados, un 8,3% máis que en 2013, se ben por primeira vez rexistrouse un
descenso no número de solicitudes presentadas, unha tendencia que se consolida
no primeiro semestre de 2015, no que existe un descenso do 13% con respecto ao
mesmo período do ano anterior.
Axencias de colocación como entes
colaboradores do Servizo Público de Emprego
Por outra
banda, o titular da Xunta destacou tamén a decisión de que as axencias de
colocación poderán ser entes colaboradores do Servizo Público de Emprego de
Galicia a partir do mes de outubro.
Máis polo
miúdo, o presidente do Executivo galego explicou que este acordo, que se
realiza ao abeiro do acordo marco estatal, ten como principal obxectivo ampliar
a intermediación no mercado laboral do colectivo de desempregados con especiais
dificultades de inserción.
Os
destinatarios desta medida serán: os beneficiarios do programa Activa ou
maiores de 45 anos con máis de dous anos de desemprego; os desempregados de
entre 26 e 44 anos con menos de 6 meses de desemprego; os beneficiarios da
RISGA, maiores de 45 anos e con máis de 2 anos de desemprego; os menores de 25
anos con formación e menos de 6 meses de desemprego, e as persoas de entre 45 e
54 anos con menos de seis meses de desemprego.
Feijóo
precisou que o Servizo Público de Emprego de Galicia será o encargado de
coordinar todo o proceso e seguilo directamente: “Así –explicou-, será o
Servizo Público de Emprego o que remita aos desempregados ás axencias; e, estes
recibirán unha atención integral, que comprenderá calquera actuación
(orientación, formación, intermediación...) que sexa positiva para o seu acceso
ao mercado laboral”.
De acordo co
que se establece nos pregos de contratación, a Xunta aboará unha contía por
cada contrato obtido, sempre que este sume un total de 6 meses nun período de
8, ou no período dun ano para o caso dos traballadores fixos discontinuos.
Para este
programa, a Xunta conta cunha partida de 4,9 millóns de euros. E, poderán optar
a este programa as axencias autorizadas polo Estado que teñan un centro aberto
en Galicia e que presentaran declaración responsable a 30 de abril (en total,
neste momento son 22).
Feijóo
afirmou que con esta iniciativa ábrese unha nova posibilidade de apoio para as
persoas que queren traballar e non poden, coa supervisión do Servizo Público de
Emprego