A Coruña.- A Autoridade Portuaria reclama, en contra do criterio do
Concello, a privatización dos peiraos para a edificación de vivendas e
oficinas. A Autoridade Portuaria esixe ao Goberno municipal que cumpra cos
convenios asinados en 2004 polo alcalde Francisco Vázquez, polos que se
acordaba a venda a mans privadas.
Esquerda Unida acusa a Autoridade Portuaria de xogar ao pelotazo urbanístico no canto
de loitar por mellorar a actividade portuaria. Nos últimos tempos o
porto ten aportado máis ás operacións urbanísticas especulativas que á mellora
da industria e o emprego. No lugar da construción de centros comerciais e
indecentes túneles millonarios que hipotecan a cidade, a tarefa principal da
Autoridade Portuaria debera ser pular por mellorar os resultados do tráfico
portuario e facer cumprir as normativas. Se no tocante ás normativas hai
queixas continuas da veciñanza polos protocolos incumpridos durante as
descargas, no lugar do aumento do tráfico portuario as actuacións máis
destacadas xiraron entorno ao formigón e ao desmantelamento produtivo.
A Agrupación local de EU propón
a adaptación do Peirao do Centenario ao tráfico de contedores. No lugar da
construción de máis vivendas, cando na cidade se estima que hai vinte mil
valeiras, defendemos a necesidade de aumentar o emprego industrial. De feito,
levamos anos pulando por esta medida, pois entendemos que sería
unha excelente fonte de riqueza e xeración de emprego. Non se pode ignorar que o transporte marítimo constitúe
o 90% do comercio mundial e deste un 75% faise a través de contedores.
Un
sector que se atopa en continuo crecemento, segundo datos da ONU estímase que
no 2015 o tráfico de contedores entre América e Europa chegará aos seis millóns
de unidades. Na actualidade A Coruña tan só capta preto do 0,1%, a pesares de
que pola nosa localización podería acadar, segundo diversos estudos, entre un 6
e u 9% do tráfico, é dicir, entre 360.000 e 540.000
contedores anuais que son a capacidade
de negocio que permitirán os 180.000 m2 do Peirao
do Centenario unha vez trasladadas a Punta Langosteira todas as actividades actuais
de graneis, carbón ou cereais. O impacto económico en termos de
xeración de emprego desta actividade, que establece un coeficiente de 6,5
postos de traballo por cada 1000 contedores, significaría un rendemento de entre 2340 e 3510 novos empregos.
O Consello Político Local de EU quere remarcar
que “cada venda do patrimonio público nos empobrece, os terreos portuarios son
espazos estratéxicos vitais para o desenvolvemento que deben dirixirse ao
emprego e non á especulación. Resulta chamativo que mentres o PP e o PSOE se
negan a reducir salarios dos responsables políticos e os custes do goberno, as
persoas nomeadas por eles, en institucións como a Autoridade Portuaria, chamen
a unha privatización constante e suicida aludindo a problemas de financiamento”.