Se ben o ensino público non
fora suficientemente degradado nestes últimos anos polo goberno do PP, o peor aínda
chegará nos próximos días coa inminente
entrada en vigor da Lei Orgánica para a Mellora da Calidade Educativa (LOMCE),
“a única lei educativa que contou co voto en contra no Congreso de todos os
demais grupos políticos”, explica Ramón Vázquez, deputado de AGE e membro da
dirección de Esquerda Unida.
Neste senso, Vázquez lamenta que “a falta de apoio no Parlamento cando se aprobou esta contrarreforma e
o amplo rexeitamento mostrado por todos os sectores da comunidade educativa non
conseguisen paralizar unha lei que busca seleccionar futuras elites dirixentes,
desprezando e segregando a aquel alumnado que máis apoio educativo precisa”.
Tal e como vén anunciando
Vázquez, “a Consellería de Educación votou o peche por vacacións sen ter
resolto os principais problemas da comunidade educativa e que nestes momentos
teñen profundamente preocupada ás familias. Concretamente, a entrada desta lei
provocará aínda máis caos ao comezo do novo curso en colexios e institutos, co
consecuente prexuízo para pais e nais, profesorado e alumnado”.
Ramón Vázquez destaca que “ademais da
aplicación incoherente da LOMCE, hai que sumar outro despropósito do goberno galego:
aproveitar o verán para pechar escolas no rural. Para o curso 2015-2016 o
alumnado galego e os pais e nais atoparanse cunha redución de medios na
educación pública que deixará trece escolas, 82 aulas e 122 prazas de
profesorado menos no rural. Ao mesmo tempo, segundo a nova orde de concertos educativos
publicada onte no Diario Oficial de Galicia, se incrementaron preto de 30 aulas
concertadas, alcanzando este curso as 3853 aulas privadas que son xestionadas
con diñeiro público”.
Fronte ao desmantelamento
sistemático da educación por parte do PP, Esquerda Unida leva dende 1986
defendendo tanto na rúa coa comunidade educativa como nas institucións e o
Parlamento, unha educación pública, universal e gratuíta; base dunha sociedade máis
xusta formada por unha cidadanía libre e crítica.
Na
actualidade, xunto coa comunidade educativa, movementos sociais, sindicatos,
especialistas en educación, mareas verdes e formacións políticas dende Esquerda
Unida traballamos para a construción colectiva dun novo modelo educativo.