O secretario
xeral do PSdeG-PSOE, José Ramón Gómez Besteiro, asegurou hoxe en Santiago que
“o Partido Popular de Mariano Rajoy e Alberto Núñez Feijóo xa non é garantía
nin sequera para os votantes de dereitas, como quedou patente en Cataluña”.
En rolda de
prensa tras a reunión da Executiva Nacional do PSdeG, Besteiro lembrou que “os
socialistas defendimos antes, durante e despois da campaña en Cataluña un
espazo de diálogo e unha reforma constitucional para adecuar a realidade
territorial á España do século XXI”.
“No Consello de
Política Federal celebrado onte en Madrid, os socialistas de toda España
reiteramos unha vez máis que plantexamos esta solución, esta saída, que xa
quedara fixada na Declaración de Granada do ano 2013, polo que é evidente a
nosa coherencia”, explicou.
“O resultado
para o PP en Cataluña é claro, deberían tomar nota como di o señor Aznar, xa
que cando un goberna debe asumir responsabilidades, todo o contrario do que fan
Rajoy en Madrid e Feijóo aquí en Galicia; os socialistas falamos con todos,
representamos a oferta política máis central e gobernamos sempre co obxectivo
da solidariedade”, engadiu.
Na Executiva
falouse tamén do proceso de elaboración das listas para as eleccións xenerais. “Recibimos
as propostas dos comités provinciais e a última decisión correspóndelle ao
Comité Federal de outubro”, manifestou o secretario xeral dos socialistas
galegos.
Por último, o
líder do PSdeG asegurou que “o réxime de incompatibilidades do partido non se
discute, é unha posición de non retorno”, antes de apuntar á próxima disolución
das Cortes como data para o seu cumprimento, “coincidindo co cambio de ciclo
político”.