O secretario xeral dos
socialistas galegos, José Ramón Gómez Besteiro, asegurou hoxe na Coruña que “o próximo 20 de decembro non se trata de votar rebeldía nin submisión, se
non a responsabilidade que representa o PSOE”.
O líder do PSdeG
pechou o acto de presentación das candidaturas dos socialistas galegos ao
Congreso dos Deputados e o Senado pola provincia da Coruña. “Temos que votar
contra o
inmovilismo e a economía especulativa do Partido Popular”, afirmou Besteiro, e
tamén “contra as opcións esencialmente liberais e socialmente coxas”.
“Os socialistas non dividimos a poboación, o
único que sempre fixemos foi construír e xerar compromisos, contaxiar ansia de
cambios e dar a cara; os cidadáns deben comprometerse e dar un paso ao fronte, a
única alternativa real é Pedro Sánchez”, manifestou na sede do PSdeG na Coruña,
chea de militantes e coa presenza do presidente da Deputación, Valentín
Formoso, alcaldes e outros cargos do partido.
“Quen vai votar pensando en Rajoy, que non
ilusiona nin á dereita?”, preguntouse Besteiro, que manifestou o desexo
socialista de que “todos os cidadáns partan da mesma liña de saída”. “Os socialistas sempre fumos o avance, o progreso, o cambio
e a reforma, fronte un PP que nunca deixou avanzar o país, como cando dicían
que o matrimonio homosexual ía rematar coas familias”, dixo.
Mar Barcón, secretaria xeral dos socialistas
na cidade, presentou o acto, mentres que o secretario provincial, Julio Sacristán,
falou da importancia do porta a porta “e de convencer aos indecisos da
necesidade dun novo modelo de recuperación xusta e con igualdade”.
Pilar Cancela, número 1 da candidatura ao
Congreso dos Deputados, garantiu “unha Galicia forte e unha España mellor” coa
presidencia de Pedro Sánchez, apostando por “aproveitar
o músculo socialista nos municipios da provincia nestas eleccións xerais, o
PSOE está nunha situación óptima para ser a primeira forza”.
Por último, Ángel Mato, cabeza de lista dos
socialistas da Coruña ao Senado, criticou “a recuperación económica con vítimas
dos últimos catro anos, o resultado do goberno do PP foi un aumento da pobreza
e os socialistas teremos como sempre o obxectivo da igualdade de
oportunidades”.