A conselleira de
Medio Ambiente e Ordenación do Territorio, Beatriz Mato, trasladou a súa
satisfacción porque Galicia conte desde hoxe cunha nova Lei do Solo que
permitirá dotar a todos os concellos de planeamento, un obxectivo prioritario
posto que o 73% dos concellos galegos non teñen o seu planeamento adaptado ou
carecen del.
A conselleira de
Medio Ambiente asistiu esta mañá ao pleno do Parlamento, onde se debateu e
aprobou a nova lei do solo, un texto máis sinxelo e simplificado, que prevé a
redución de trámites, o que representa unha oportunidade de crecemento.
Reiterou que se
trata dun dos proxectos lexislativos máis importantes da actual lexislatura e
que nace con vocación de futuro e de permanencia; e que pon o interese xeral
que supón a paisaxe por riba de calquera interese privado ou particular. A
Xunta defende que coñecer e preservar a paisaxe galega debe ser obxectivo de
todos, polo que insiste na idea de corresponsabilidade en materia de ordenación
do territorio e protección da paisaxe. Apuntou que alcanzar un alto grado de
sensibilización e concienciación social nesta materia será o primeiro paso para
cumprir os obxectivos.
A modo de
exemplo, a lei establece o marco necesario para que as construcións se adapten
ao contorno, grazas ao fomento da recuperación do xa construído fronte a novas
estruturas e reforza a obriga de rematar exteriormente as construcións, poñendo
fin ao deterioro das paisaxe galega.
Beatriz Mato
aclarou que a nova Lei entrará en vigor un mes despois da súa publicación do
Diario Oficial de Galicia, polo que se prevé que estee vixente a mediados de
marzo. O desexo do Goberno galego é contar cunha Galicia ordenada, sostible,
capaz de crecer e de ser competitiva, ao tempo que respecta o seu patrimonio,
os seus valores naturais e a súa paisaxe.
A titular de
Medio Ambiente destacou o traballo realizado polo Goberno galego nos últimos
anos a prol da mellora e actualización da ordenación do territorio galego,
grazas á aprobación en 2011 das Directrices de Ordenación do Litoral e do Plan
de Ordenación do Litoral.