A recollida de avais para as candidaturas
socialistas á presidencia da Xunta abriuse hoxe e as persoas que se rexistren
como precandidatas terán ata o próximo día 13 de maio, ás 13.00 horas, para
acadar un mínimo de 1.010 apoios de militantes, un 10% da totalidade do censo
válido para o proceso. Esta fase ábrese con Xoaquín Fernández Leiceaga como
único precandidato inscrito ata o de agora.
Os e as militantes do PSdeG teñen xa á súa
disposición os modelos oficiais de avais nas súas sedes e na web www.psdeg-psoe.com/primarias/ Os avais son
nominativos, cun modelo oficial aprobado pola Comisión Nacional de Garantías
Electorais do PSdeG que leva o nome do precandidato ou precandidata previamente
rexistrado no partido.
Os representantes das precandidaturas, as
agrupacións provinciais e municipais e a militancia poderán entregar os avais
na sede do partido en Santiago de Compostela. Tamén se aceptarán avais
individuais a través do correo primarias@socialistasdegalicia.com, adxuntando a imaxe
do aval oficial xunto coa fotocopia do DNI. As persoas precandidatas deberán
adherirse ao Código Ético dos socialistas e entregar a súa declaración de bens. Departamento de comunicación