O secretario xeral para o Deporte, José Ramón Lete Lasa, recibiu hoxe ao regatista pontevedrés Fernando Echávarri, ao que
felicitou polos seus recentes logros deportivos, tras conquistar ou primeiro
posto na Copa do Mundo de Hyères en Nacra 1, xunto co seu tripulante Tara
Pacheco e a súa clasificación para Río 2016.
Na recepción celebrada esta mañá en Santiago,
Lete Lasa asegurou que “todos os que pertencemos dun xeito ou doutro ao mundo
do deporte e os propios afeccionados sabemos moi ben que estes resultados nas
competicións levan detrás moitas horas de adestramento, renuncias e sacrificio,
unidos á paixón e á ambición por ser cada día mellores no que dá sentido e
plenitude ás nosas vidas”.
No caso do deportista pontevedrés, o
secretario xeral destacou o seu especial mérito pola rápida adaptación á súa
nova embarcación, xa que, despois de sete anos sen subir a un catamarán
pequeno, quedaron décimo terceiros no Mundial de Florida, cuartos no Trofeo
Princesa Sofía e campións en Hyères. Ademais, antes de chegar Río acudirán á
Copa do Mundo de Weymouth en xuño.
Lete Lasa quixo lembrar que, para o Goberno
galego, a promoción dos deportes náuticos ten carácter estratéxico polas excelentes
condicións que ofrecen ás súas costas, ríos e encoros, o que se reflicte nas
políticas desenvoltas desde a Secretaría Xeral para o Deporte.
O secretario xeral rematou a súa intervención dicíndolle a Echávarri que
“Galicia agradéceche que, xunto ao teu nome, a nosa Comunidade se proxecte con
tanta autoridade e brillantez”, manifestando que “a achega á boa imaxe de
Galicia que facedes os deportistas galegos da elite mundial é moi alta e, por tanto,
non pode ser menos o noso recoñecemento, orgullo e apoio, o da Xunta e o de
todos os galegos”.