Gonzalo Caballero, segundo precandidato nas primarias do PSdeG

O militante socialista Gonzalo Caballero vén de rexistrar a súa precandidatura no proceso de primarias do PSdeG e convértese así no segundo precandidato xunto con Xoaquín Fernández Leiceaga.As persoas que se rexistren como precandidatas terán ata o próximo día 13 de maio, ás 13.00 horas, para acadar un mínimo de 1.010 apoios de militantes, un 10% da totalidade do censo válido para o proceso.

Os militantes do PSdeG teñen xa á súa disposición os modelos oficiais de avais nas súas sedes e na web. Os avais son nominativos, cun modelo oficial aprobado pola Comisión Nacional de Garantías Electorais do PSdeG que leva o nome do precandidato ou precandidata previamente rexistrado no partido. 

Os representantes das precandidaturas, as agrupacións provinciais e municipais e a militancia poderán entregar os avais na sede do partido en Santiago de Compostela. Tamén se aceptarán avais individuais a través do correo primarias@socialistasdegalicia.com, adxuntando a imaxe do aval oficial xunto coa fotocopia do DNI. As persoas precandidatas deberán adherirse ao Código Ético dos socialistas e entregar a súa declaración de bens. Departamento de comunicación