El Confidencial
radiolider Buscador de noticias buscar en google
Nacional

ENTRE OS ANOS 2008 E 2015

Sogama remitiu á Industria recicladora máis de 190.000 toneladas de residuos de envases

17-05-2016 21:06:20

Entre os anos 2008 e 2015, Sogama remitiu á industria recicladora 192.069 toneladas de residuos de envases. Desta cantidade, 81.635 toneladas procedían da recollida selectiva do contedor amarelo, destinado a acoller os envases de plástico, as latas e os briks; e o resto, do lixo en masa, fundamentalmente envases de aceiro e aluminio que non foron depositados previamente pola poboación no recipiente amarelo para a súa posterior recuperación, así como o vidro, que debería ser introducido no iglú verde.   

Respecto ao recipiente amarelo, e tralo correspondente sistema de selección automático, a empresa pública logrou recuperar 15.032 toneladas de férricos, 769 de aluminio, 12.386 de briks e 53.447 de plástico, segundo a seguinte distribución: 7.536 toneladas de Polietileno de Alta Densidade –PEAD- ou plástico duro, 18.476 de Polietileno de Baixa Densidade –PEBD- ou plástico fino, 18.930 de Polietileno Tereftalato –PET- e 9.505 de plásticos varios ou plástico mestura.   

Pola súa banda, e atendendo ao lixo en masa, introducido polos cidadáns no contedor verde convencional, conseguiu recuperar 76.052 toneladas de envases de aceiro e 2.040 de aluminio. E a partir do 2013, introduciu a recuperación de vidro, sumando entre ese ano e o 2015, 32.343 toneladas.    


Incremento da reciclaxe nun mínimo do 30%

O obxectivo da entidade a medio prazo é incrementar as cifras de reciclado nun mínimo do 30%. A isto contribuirá a posta en marcha, no complexo medioambiental de Cerceda, dunha planta específica para a recuperación dos envases plásticos e de papel/cartón contidos no lixo xenérico e que tampouco foron depositados en orixe polos cidadáns nos contedores de destino, é dicir, amarelo e azul respectivamente.   

De forma paralela, a Consellería de Medio Ambiente e Ordenación do Territorio e Sogama intensificaran as súas campañas de concienciación social da poboación en materia de medio ambiente, e máis concretamente na xestión sostible dos residuos urbanos, para que a reciclaxe se asente na vida das persoas e a separación dos materiais se incorpore plenamente aos seus hábitos diarios. Só así será posible acadar os seus beneficios ambientais e socioeconómicos, destacando o aforro de enerxía e materias primas.   

Cabe recordar que Sogama decidiu ampliar a súa infraestrutura industrial, á que destinará un investimento de 30 millóns de euros, para dar un tratamento óptimo a todos os residuos que se reciben na mesma e incrementar as taxas de reciclado. Non obstante, a axuda do cidadán tórnase indispensable para avanzar cara a unha xestión máis sostible dos refugallos. É por iso que a práctica do principio dos tres erres convértese na mellor medida: reducir a produción de lixo; fomentar a reutilización; e separar correctamente os materiais para depositalos nos contedores de destino e garantir desta forma que se volvan a converter en novos produtos de utilidade.   

Pola súa banda, a planta de compostaxe industrial que a entidade levantará no vertedoiro de residuos non perigosos de Areosa, e na que investirá preto de 4 millóns de euros, permitirá tratar 15.000 toneladas anuais de materia orgánica procedente de grandes xeradores como centros comerciais, mercados, cárceres e hostalería, entre outros. Nesta instalación non se van procesar os desperdicios orgánicos contidos na fracción resto, dado que o obxectivo é fabricar un compost de calidade que teña saída no mercado e que aporte nutrientes ao solo e para isto ten que haber unha correcta selección da materia orgánica en orixe.          





www.galiciadiario.com no se hará responsable de los comentarios de los lectores. Nuestro editor los revisará para evitar insultos u opiniones ofensivas. Gracias